ក្រុមអ្នកកាសែតអន្តរជាតិប្រចាំកម្ពុជា ហៅកាត់ថា OPCC បានអំពាវនាវទៅរដ្ឋាភិបាលកម្ពុជា ឲ្យដោះលែងអតីតអ្នកសារព័ត៌មានវិទ្យុអាស៊ីសេរី ២រូប ឲ្យមានសេរីភាពឡើងវិញ ដោយចាត់ទុកការចាប់ខ្លួន និងការចោទប្រកាន់លើអ្នកសារព័ត៌មានទាំង ២រូបនោះ ជាការបន្តបង្ក្រាបទៅលើសេរីភាពនៃសារព័ត៌មាននៅកម្ពុជា។
អតីតបុគ្គលិកវិទ្យុអាស៊ីសេរី លោក អ៊ួន ឈិន និងលោក យាង សុជាសុធារិន ហៅ យាង សុជាមេត្តា ត្រូវបានសមត្ថកិច្ចចាប់ខ្លួនកាលពីថ្ងៃទី១៥ ខែវិច្ឆិកា ហើយ ៣ថ្ងៃក្រោយមក ត្រូវបានតុលាការចោទប្រកាន់ពីបទ «ប្រគល់ឲ្យរដ្ឋបរទេសនូវព័ត៌មានជាអាទិ៍ ដែលបង្កឲ្យមានការអន្តរាយដល់ការការពារជាតិតាម» តាមមាត្រា ៤៤៥ នៃក្រមព្រហ្មទណ្ឌ។
អ្នកទាំងពីរ អាចនឹងត្រូវប្រឈមទោសជាប់ពន្ធនាគារដល់ទៅ ១៥ឆ្នាំ នៅក្រោមការចោទប្រកាន់បែបនេះ។
ទោះជាយ៉ាងណា ក្លឹបអ្នកកាសែតបរទេសនៅកម្ពុជា បានជំទាស់ទៅនឹងការចោទប្រកាន់ប្រឆាំងនឹងអតីតអ្នកសារព័ត៌មានទាំងពីររូបនេះ ហើយចាត់ទុកទង្វើរបស់អាជ្ញាធរកម្ពុជា ជាការបន្តបង្ក្រាបទៅលើសេរីភាពសារព័ត៌មាននៅកម្ពុជា។
OPCC បានអំពាវនាវទៅរដ្ឋាភិបាលកម្ពុជា ឲ្យដោះលែងអតីតអ្នកសារព័ត៌មានវិទ្យុអាស៊ីសេរីទាំង ២រូបនេះ ឲ្យមានសេរីភាពឡើងវិញ ហើយក៏ទាមទារឲ្យសារព័ត៌មានដំណើរការដោយសេរីគ្មានការបំភិតបំភ័យ ស្របតាមរដ្ឋធម្មនុញ្ញរបស់ប្រទេសនេះ។
ក្រៅពីក្រុមអ្នកកាសែតបរទេស ក្រុមអ្នកសារព័ត៌មានកម្ពុជា ក៏បានអំពាវនាវផងដែរទៅតុលាការ ឲ្យទម្លាក់ចោលការចោទប្រកាន់ទៅលើអ្នកសារព័ត៌មានទាំងពីរនេះ ដោយថា ការចោទប្រកាន់នោះ «ធ្ងន់ធ្ងរ» និងធ្វើឲ្យសេរីភាពសារព័ត៌មាននៅកម្ពុជាធ្លាក់ចុះផងដែរ៕