អង្គការសង្គមស៊ីវិលធ្វើការលើកផ្នែកលើកកម្ពស់តម្លាភាពនៅក្នុងសង្គម ជំរុញឲ្យគណបក្សនយោបាយដែលចូលរួមការប្រកួតប្រជែងក្នុងការបោះឆ្នោតនៅពេលខាងមុខនេះ ត្រូវប្រកាសទ្រព្យសម្បត្តិជាសាធារណៈ ដើម្បីឲ្យម្ចាស់ឆ្នោតមានសេចក្តីទុកចិត្ត និងជាផ្នែកមួយសំខាន់ក្នុងការចូលរួមទប់ស្គាត់អំពើពុករលួយ។
ប្រធានអង្គការគណនេយ្យភាពកម្ពុជាលោក គុយ មាសសំណាង ថ្លែងប្រាប់វីអូឌីនៅថ្ងៃនេះថា លោកនឹងធ្វើយុទ្ធនាការនៅដើមឆ្នាំក្រោយនេះ ដើម្បីជំរុញឲ្យថ្នាក់ដឹកនាំគណបក្សនយោបាយទាំងអស់ប្រកាសទ្រព្យសម្បត្តិជាសាធារណៈ។ លោកបន្តថា កន្លងមកលោកបានដាក់លិខិតទៅកាន់ថ្នាក់ដឹកនាំ គណបក្សសង្គ្រោះជាតិនិង គណបក្សប្រជាជនកម្ពុជា ដើម្បីពិភាក្សាពីការប្រកាសទ្រព្យសម្បត្តិជាសាធារណៈ ប៉ុន្តែគណបក្សទាំងពីរមិនឆ្លើយតបទេ។
លោក គុយ មាសសំណាង មានប្រសាសន៍ថា ការប្រកាសទ្រព្យជាសាធារណៈរបស់ថ្នាក់ដឹកនាំបក្ស ពិសេសគណបក្សធំៗដែលមានសំឡេងនៅក្នុងសភា មានផលប្រយោជន៍ច្រើន ដូចជាការបង្ហាញភាពជាគំរូក្នុងការប្រឆាំងអំពើពុករលួយ លើកកម្ពស់តម្លាភាពសង្គម និងផ្តល់ទំនុកចិត្តឲ្យពលរដ្ឋជាដើម៖ «ជួយបង្កើនជំនឿទុកចិត្តលើអ្នកនយោបាយ គណបក្សនយោបាយថា គាត់មានឆន្ទៈក្នុងការចាប់ផ្តើមប្រឆាំងអំពើពុករលួយចាប់ពីខ្លួនគាត់ទៅ ទី២គាត់អនុញ្ញាតិឲ្យឲ្យពលរដ្ឋចូលរួមតាមដានថា ទ្រព្យសម្បត្តិដែលគាត់ប្រកាសតាមអនឡាញនិង ទ្រព្បសម្បត្តិជាក់ស្តែងនោះដូចគ្នាឬអត់»។
សម្រាប់អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងថា គណបក្សរបស់លោកទាមទារឲ្យមានការប្រកាសទ្រព្យសម្បត្តិជាសាធារណៈតាំងពីច្បាប់ប្រឆាំងអំពើពុករលួយទើបបង្កើតឡើង ប៉ុន្តែគណបក្សប្រជាជនកម្ពុជាមិនព្រម។ លោកន្តថា ពេលនេះគណបក្សសង្គ្រោះជាតិបានដាក់គោលនយោបាយរបស់ខ្លួនរួចហើយថា អ្នកពាក់ព័ន្ធត្រូវប្រកាសទ្រព្យសម្បត្តិ គឺប្រកាសជាសាធារណៈ ហើយគោលនយោបាយនេះ នឹងដាក់ឲ្យអនុវត្តន៍ពេលគណបក្សឈ្នះការបោះឆ្នោត៖ «យើងក៏ចូលរួមដើម្បីកែច្បាប់ឲ្យអ្នកនយោបាយប្រកាសទ្រព្យសម្បត្តិជាសាធារណៈដែរ គឺគណបក្សសង្គ្រោះជាតិអត់មានជំទាស់អីទេ ដឹងតែធ្វើឲ្យបាន ហើយឲ្យបានឆាប់ទៀតផង»។
ប៉ុន្តែពេលសួរថា តើថ្នាក់ដឹកនាំគណបក្សសង្គ្រោះជាតិអាចប្រកាសជាសាធារណៈដោយស្ម័គ្រចិត្តជាមួយអង្គការគណនេយ្យភាពកម្ពុជាដែរឬទេ? លោក យឹម សុវណ្ណ ថាគណបក្សលោករង់ចាំមានច្បាប់សិន ទើបអនុវត្តន៍។
វីអូឌីមិនទាន់អាចសុំការឆ្លើយតបពីអ្នកនាំពាក្យគណបក្សប្រជាជនកម្ពុជាទាំងបីរូប គឺលោក សុខ ឥសាន លោក សួស យ៉ារ៉ា និងលោក ឈឹម ផលរវុន បានទេ ដោយទូរសព្ទអ្នកទាំងបីខ្លះហៅមិនចូល និងខ្លះទៀតចូលតែមិនមានអ្នកទទួល។
ទោះយ៉ាងណា កន្លងទៅអង្គភាពប្រឆាំងអំពើពុករលួយរបស់រដ្ឋាភិបាលធ្លាប់បកស្រាយថា ការប្រកាសទ្រព្យសម្បត្តិដោយអសាធារណៈនៅពេលបច្ចុប្បន្ននេះ គឺគ្រប់គ្រាន់ហើយក្នុងការប្រឆាំងអំពើពុករលួយ ហើយថាការប្រកាសជាធារណៈ បារម្ភពីសុវត្ថិភាពរបស់ម្ចាស់ទ្រព្យសម្បត្តិទាំងនោះ។
របាយការណ៍អង្គការគណនេយ្យភាពកម្ពុជាឲ្យដឹងថា គិតត្រឹមចុងឆ្នាំ២០១៦នេះ បុគ្គលិកអង្គការសង្គមស៊ីវិល បុគ្គលិកក្រុមហ៊ុន មន្ត្រីរដ្ឋ មន្ត្រីគណបក្សមានចំនួនជាង៤០នាក់ បានស្ម័គ្រចិត្តប្រកាសទ្រព្យសម្បត្តិខ្លួនជាសាធារណៈ។ លោក គុយ មាសសំណាង បញ្ជាក់ថា សាធារណជនពិសេសថ្នាក់ដឹកនាំគណបក្សនយោបាយអាចប្រកាសទ្រព្យជាសាធារណៈជាមួយគេហទំព័ររបស់អង្គការគណនេយ្យភាពកម្ពុជាឬអាចប្រកាសលើគេហទំព័រផ្ទាល់ខ្លួនក៏បាន ដើម្បីឲ្យសាធារណជនបានដឹង បង្ហាញតម្លភាព៕
