អនុប្រធានសហជីពស៊ីខៅឌូ ប្រចាំរោងចក្រមួយ ស្ថិតក្នុងខណ្ឌមានជ័យ រាជធានីភ្នំពេញ បានរងរបួសក្បាល បន្ទាប់ពីត្រូវជនមិនស្គាល់មុខ វាយពីក្រោយ អំឡុងពេលគាត់ដើរចេញពីរោងចក្រទៅរកអាហារថ្ងៃត្រង់នៅមុខរោងចក្រ។
អ្នកស្រី ពៅ ទូច ភរិយាលោក សឿង ប្រុស ដែលជា អនុប្រធានសហជីពស៊ីខៅឌូ នៅរោងចក្រ W&D បានអះអាងថា ស្វាមីរបស់គាត់ត្រូវជនមិនស្គាល់មុខវាយនឹងខ្សែក្រវ៉ាត់ពីក្រោយ នៅវេលាថ្ងៃត្រង់ថ្ងៃចន្ទម្សិលមិញ។
អ្នកស្រី ពៅ ទូច បានឱ្យដឹងទៀតថា ស្វាមីរបស់គាត់រងរបួសរហែកប្រវែង ៣ថ្នេរ បន្ទាប់ពីត្រូវបានបញ្ជូនសង្គ្រោះ និងព្យាបាលនៅមន្ទីរពេទ្យមិត្តភាពខ្មែរ-សូវៀត។
គួរបញ្ជាក់ថា លោក សឿង ប្រុស គឺ អនុប្រធានសហជីពមួយរូប ដែលសកម្មក្នុងការតវ៉ា និងការពារផលប្រយោជន៍ជូនកម្មករ ដែលថៅកែបានព្យាយាមបញ្ឈប់កាលពីឆ្នាំមុន៕