ក្រុមហ៊ុនអាកាសចរណ៍ Egypt Air បានឲ្យដឹងថា យន្តហោះរបស់ក្រុមហ៊ុននេះដែលត្រូវគេប្លន់ បានចុះចតនៅព្រលានយន្តហោះ Larnaca លើកោះ Cyprus ហើយភាគច្រើននៃអ្នកដំណើរនៅលើយន្តហោះនេះត្រូវបានដោះលែងហើយ។
បណ្ដាញផ្សាយព័ត៌មាន BBC បានរាយការណ៍ថា ក្រុមហ៊ុន Egypt Air ប្រកាសថា ការចរចាបាននាំឲ្យមានការដោះលែងអ្នកដំណើរស្ទើរទាំងអស់លើយន្តហោះនោះ លើកលែងតែបុគ្គលិកធ្វើការលើយន្តហោះ និងអ្នកដំណើរបរទេសចំនួន៤នាក់។
វីដេអូពីព្រលានយន្តហោះ Larnaca ដែលជាកន្លែងយន្តហោះនោះចុះចតបានបង្ហាញថា មនុស្សបានចាកចេញពីយន្តហោះនោះ ហើយឡើងជិះរថយន្ដក្រុងមួយ។
ជើងហោះហើរ MS 181 របស់ក្រុមហ៊ុន Egypt Air ត្រូវបានដណ្ដើមយក បន្ទាប់ពីអ្នកដំណើរម្នាក់បាននិយាយថា រូបគេមានពាក់គ្រឿងផ្ទុះនៅលើខ្លួន។ យន្តហោះនោះបានហោះចេញពីទីក្រុងអាឡិចសាន់ឌ្រា (Alexndria) សម្ដៅទៅក្រុងទៅទីក្រុងខៃរ៉ូ (Cairo) ដោយមានផ្ទុកអ្នកដំណើរ៨១នាក់ តែយន្តហោះនេះត្រូវបានបង្ខំឲ្យបង្វែរទិសដៅទៅកោះ Cyprus វិញ។
របាយការណ៍ចុងក្រោយបំផុតពីប្រព័ន្ធផ្សព្វផ្សាយ Cypriot ឲ្យដឹងថា មានតែមនុស្សម្នាក់ប៉ុណ្ណោះដែលបានធ្វើការប្លន់យន្តហោះនេះ ដោយត្រូវគេជឿថាដោយសារ “ហេតុផលផ្ទាល់ខ្លួន” ហើយអាចប្រហែលមកពីរូបគេកំពុងស្វែងរកសិទ្ធិជ្រកកោន។ បើទោះបីជាយ៉ាងណា មិនទាន់មានការបញ្ជាក់ពីករណីនេះនៅឡើយទេ៕
