ប្រជាពលរដ្ឋវៀតណាមរស់នៅទីក្រុងហាណូយអំពាវនាវឲ្យមានអន្តរាគមន៍ពីរដ្ឋាភិបាលជួយពួកគេ ដោយសារជំនន់ទឹកភ្លៀងកាលពីយប់ថ្ងៃអង្គារម្សិលមិញបានលិចផ្ទះនិងផ្លូវជាច្រើនកន្លែង។
សារព័ត៌មាន Vietnam News បានចុះផ្សាយថាភ្លៀងមួយមេធំបានចាប់ធ្លាក់កាលពីយប់ថ្ងៃអង្គារ ហើយបន្តរហូតដល់ព្រឹកថ្ងៃពុធដែលបណ្តាលឲ្យទឹកជន់លិចក្នុងកម្រិតជ្រៅជាច្រើនកន្លែងទាំងផ្ទះប្រជាពលរដ្ឋនិងផ្លូវសំខាន់ៗ។ ភ្លៀងបានធ្លាក់ខ្លាំងនៅខាងលិចនៃទីក្រុង ហើយទឹកជំនន់កំពុងលិចខ្លាំងនៅក្នុងសង្កាត់ចំនួន៥។
នៅព្រឹកថ្ងៃពុធនេះ ចរាចរណ៍កកស្ទះរាប់ម៉ោងនៅពេលមនុស្សសម្រុកធ្វើដំណើរទៅធ្វើការនិងទៅសាលារៀន ខណៈទឹកនៅជន់លិចហើយភ្លៀងនៅតែបន្តធ្លាក់។
អាជ្ញាធរវៀតណាមកំពុងព្រួយបារម្ភថាភ្លៀងមួយមេធំនេះនឹងអាចប៉ះពាល់ហេដ្ឋារចនាសម្ព័ន្ធមួយចំនួន។
ទោះយ៉ាងណារដ្ឋាភិបាលវៀតណាមមិនទាន់បានសរុបរបាយការណ៍ខូចខាតដែលបណ្តាលមកពីភ្លៀងមួយមេធំនេះនៅឡើយ៕