លោកនាយករដ្ឋមន្រ្តី ហ៊ុន សែន នៅថ្ងៃនេះបានបន្តយុទ្ធនាការចុះមូលដ្ឋាន ដោយជួបអាជីវករនៅផ្សារមួយក្នុងខេត្តស្ទឹងត្រែង ហើយលោកបានទិញពោតស្ងោរពីស្រ្តីម្នាក់ដោយម៉ៅយកទាំងបេ ដោយថាឲ្យមួយលានរៀល ខណៈអ្នកលក់ប្រាប់ថាពោតមួយផ្លែថ្លៃ៥០០រៀល។នេះបើតាមវីដេអូដែលផ្សាយតាមហ្វេសប៊ុករបស់លោកនៅថ្ងៃពុធនេះ។
បន្ថែមពីនេះ លោក ហ៊ុន សែន ក៏បានម៉ៅយកបន្លែស្លឹកងុបពីស្រ្តីម្នាក់ទៀតដោយឲ្យប្រាក់លើសពីតម្លៃលក់។លើសពីនេះទៀត លោកបានចែកលុយដល់អ្នកសុំទានក្នុងផ្សារនោះនិងចែកលុយដល់ក្មេងៗមួយចំនួនទៀត ដែលលុយទាំងនោះត្រូវបានរៀបចំក្នុងស្រោមសំបុត្ររួចជាស្រេច។
កាលពីអំឡុងខែមិថុនា លោក ហ៊ុន សែន បានផ្តល់លុយចំនួន១០០០ដុល្លារឲ្យបុរសម្នាក់ដែលអះអាងថាជាអ្នករត់ម៉ូតូឌុបឆ្លងស្ពាននៅខេត្តកោះកុង ខណៈលោកនាយករដ្ឋមន្រ្តីទៅចូលរួមបុណ្យសពលោក សាយ ភូថង។
លោក ហ៊ុន សែន បានប្រកាសធ្វើយុទ្ធនាការចុះជួបពលរដ្ឋនៅតាមមូលដ្ឋានចំនួន២៥ខេត្ត-រាជធានី ដោយថាដើម្បីជំរុញឲ្យមានអភិបាលកិច្ចល្អ។ ប៉ុន្តែអ្នកប្រើហ្វេសប៊ុកមួយចំនួនបានរិះគន់ថាលោក ហ៊ុន សែន បានយកលំនាំមេដឹកនាំគណបក្សប្រឆាំងគឺលោក សម រង្ស៊ី និងលោក កឹម សុខា ដែលកន្លងមកច្រើនតែចុះជួបផ្ទាល់ជាមួយពលរដ្ឋនៅតាមមូលដ្ឋាននិងអាជីវករតាមផ្សារ៕