មេដឹកនាំកម្លាំងប្រដាប់អាវុធបះបោរនៅមីយ៉ាន់បានបើកកិច្ចពិភាក្សាពីបញ្ហាសង្គ្រាមនៅតាមព្រំដែនកាលពីថ្ងៃពុធម្សិលមិញ ដើម្បីត្រៀមខ្លួនក្នុងការជួបពិភាក្សាសន្តិភាពជាមួយរដ្ឋាភិបាលនៅពេលខាងមុខ។
មីយ៉ាន់ម៉ាញ៉ាំញីដោយសង្គ្រាមស៊ីវិលជាមួយពួកបះបោរជាជនជាតិដើមភាគតិចកើតឡើងនៅក្នុងប្រទេសប្រមាណកន្លះសតវត្សរ៍មកនេះ ដែលបណ្តាលឲ្យមនុស្សរាប់សែននាក់ស្លាប់និងត្រូវជម្លៀសទៅរកកន្លែងមានសុវត្ថិភាព។
ក្រុមមួយចំនួននៃពួកបះបោរទាំងនោះបានចុះហត្ថលេខាលើការឈប់បាញ់គ្នា ប៉ុន្តែក្រុមបះបោរជាច្រើនក្រុមទៀតនៅតែបន្តវាយប្រហារជាមួយកងកម្លាំងរបស់ជាតិរួមបញ្ចូលទាំងក្រុមបះបោរនៅភាគខាងជើងនៃរដ្ឋកាចីនផង។ នេះបើតាមសារព័ត៌មានបាងកកប៉ុស្តិ៍។
លោកស្រី អ៊ុង សានស៊ូជី ជាសកម្មជនជំរុញឲ្យមានលទ្ធិប្រជាធិបតេយ្យបានដឹកនាំរដ្ឋាភិបាលស៊ីវិលលើកដំបូង ហើយសន្យាបញ្ចប់សង្គ្រាមស៊ីវិលជាមួយក្រុមជនជាតិដើមភាគតិច។ លោកស្រីចង់ចាប់ផ្តើមចរចាសន្តិភាពដោយពេញលេញនៅប៉ុន្មានសប្តាហ៍ខាងមុខនេះ៕
