ប្រធានាធិបតីហ្វីលីពីនលោក រ៉ូឌ្រីហ្គោ ឌូធឺត កាលពីថ្ងៃព្រហស្បតិ៍ម្សិលមិញបានបញ្ជូនបេសកជនទៅប្រទេសចិន ដើម្បីដោះស្រាយជម្លោះដែនសមុទ្រ ដោយផ្អែកលើសេចក្តីសម្រេចរបស់តុលាការយុត្តិធម៌អន្តរជាតិ។
តុលាការអន្តរជាតិនៅទីក្រុងឡាអេ កាលពីថ្ងៃទី១២ខែកក្កដាបានចេញសេចក្តីសម្រេចឲ្យចិនចាញ់ក្តីហ្វីលីពីនក្នុងជម្លោះដែនសមុទ្រនៅសមុទ្រចិនខាងត្បូង។ ការសម្រេចនេះហ្វីលីពីនប្រកាសទទួលយក តែចិនបានច្រានចោល។
លោក ឌូធឺត បានស្នើឲ្យអតីតប្រធានាធិបតីលោក ហ្វីដែល រ៉ាមូស ធ្វើដំណើរទៅកាន់ប្រទេសចិន ដើម្បីជជែកពីបញ្ហានេះ។
លោក ឌូធឺត បញ្ជាក់ថាការធ្វើសង្គ្រាមមិនមែនជាជម្រើសទេ ហើយការជជែកដោយសន្តិភាពជាចំណុចចម្បង។ លោក ឌូធឺត ថ្លែងក្នុងពិធីជួបជុំមួយដែល មានការចូលរួម ពីអតីតប្រធានធិបតីរ៉ាមូស។
លោក ឌូធឺ ថាលោកបានពិភាក្សាជាមួយមនុស្សជាច្រើន ហើយក្នុងនោះមានទាំងលោក រ៉ាមូស ផង ហើយលោកគោរពនិងស្នើឲ្យលោក រ៉ាម៉ូស ធ្វើដំណើរទៅប្រទេសចិនចាប់ផ្តើមពិភាក្សា៕
