ព្រះតេជគុណ ប៊ុត ប៊ុនតិញ ដែលស្និទនឹងលោកបណ្ឌិត កែម ឡី អះអាងថាព្រះអង្គកំពុងស្នាក់នៅក្រៅប្រទេសមួយរយៈដោយអះអាងថាបារម្ភពីសុវត្ថិភាពនិងថាមានគេតាមរំខានដល់កន្លែងធ្វើការរបស់ព្រះអង្គ។
ព្រះតេជគុណ ប៊ុត ប៊ុនតិញ ប្រាប់VODនៅព្រឹកថ្ងៃនេះតាមបណ្ដាញសង្គមថាព្រះអង្គកំពុងស្នាក់នៅក្នុងមន្ទីរពេទ្យមួយក្នុងប្រទេសថៃ ដើម្បីព្យាបាលសុខភាព ក្រោយពីមានការនឿយហត់ពីការរៀបចំពិធីបុណ្យសពលោក បណ្ឌិត កែម ឡី និងជាការទៅតាមការណាត់ជួបពីក្រុមគ្រូពេទ្យនៅប្រទេសថៃនោះ។ ប៉ុន្ដែព្រះអង្គថាការភៀសព្រះកាយនេះ ក៏ដើម្បីបញ្ចៀសការរំខានរបស់មនុស្សមួយចំនួនដែលតាមសាកសួរព្រះអង្គនៅកន្លែងធ្វើការនៅប្រទេសកម្ពុជា ប៉ុន្ដែព្រះមិនបានបញ្ជាក់ថាជាសមត្ថកិច្ចឬជាជនស៊ីវិលនោះទេ។
ទោះជាយ៉ាងនេះក្តីព្រះអង្គអះអាងថានឹងវិលត្រឡប់មកកាន់ស្រុកកំណើត។
មុនពេលចាកចេញពីកម្ពុជា ព្រះតេជគុណ ប៊ុត ប៊ុនតិញ អះអាងថាព្រះអង្គបានទទួលទូរសព្ទពីជនមិនស្គាល់អត្តសញ្ញាណម្នាក់នៅថ្ងៃទី២៦ខែកក្កដានេះ ដោយអះអាងថារូបគេជានគរបាល ហើយប្រាប់ព្រះអង្គថាមានសមត្ថកិច្ចកំពុងតាមរកព្រះអង្គ ប៉ុន្តែមិនបានបញ្ជាក់ពីមូលហេតុអ្វីទេរួចបិទទូរសព្ទវិញ។
ព្រះអង្គមានសង្ឃដីកាថា៖ “ទទួលទូរសព្ទតាំងពីម៉ោង៧ព្រឹកនេះថា គាត់ជាប៉ូលីសគាត់អាណិតគាត់ស្រលាញ់ហើយគាត់ប្រគេនដំណឹងមកតេជគុណ សុំឲ្យតេជគុណរកកន្លែងមានសុវត្ថិភាពទៅ ព្រោះឥឡូវនេះខាងប៉ូលីសគេតាមដានរកតេជគុណហើយ។ … អត្មាគិតតាមឧត្តមបណ្ឌិតរបស់លោក កែម ឡី ដែលថា យើងរស់នៅស្រុកមួយដែលមានខ្លា មានសត្វសាហារវមានពស់វែកអីច្រើន យើងខំប្រឹងគេចទៅណាក៏គេចមិនរួចដែរ ពិបាកនឹងគេចណាស់ បើគេចង់ចាក់គេចង់ខាំវាងាយស្រួលសម្រាប់គេទេ ព្រោះយើងឋិតក្នុងទីតាំងមួយដែលគេអាចធ្វើបាបយើងបានគ្រប់ពេល”។
ព្រះតេជគុណ ប៊ុត ប៊ុនតិញ បន្តថាព្រះអង្គមានការបារម្ភខ្លះដែរពីសុវត្ថិភាព តែព្រះអង្គថាទោះជាចង់គេចទៅណាក៏មិនរួចដែរបើសមត្ថកិច្ចចង់ចាប់ព្រះអង្គនោះ។
VOD មិនអាចទាក់ទងសមត្ថកិច្ចនៅក្នុងប្រទេសកម្ពុជា ដើម្បីសាកសួរបានភ្លាមៗនៅឡើយទេ។ ប៉ុន្ដែអ្នកនាំពាក្យក្រសួងមហាផ្ទៃលោក ខៀវ សុភ័គ ធ្លាប់បានបដិសេធពីដំណឹងដែលថាសមត្ថកិច្ចតាមរកចាប់ព្រះតេជគុណ ប៊ុត ប៊ុនតិញ ដោយលោកថាមិនមានហេតុផលណាដែលសមត្ថកិច្ចត្រូវការតាមរកព្រះអង្គនោះទេ។ លោកមានប្រសាសន៍ថា៖ “សូមព្រះអង្គគិតឡើងវិញមើលថា ក្រែងលោវាមិនមែនសមត្ថកិច្ចឬមួយយ៉ាងម៉េចយ៉ាងម៉ា ហីក៏អ្នកដទៃ បើជាសមត្ថកិច្ច គ្មានទេ!”។ លោកបានបន្ថែមថាបើមានការគំរាមណាមួយដល់ព្រះអង្គ សូមព្រះអង្គនិមន្តទៅប៉ុស្តិ៍ប៉ូលីសណាដែលនៅក្បែរព្រះអង្គដើម្បីទទួលបានការការពារ។
លោកថា៖ “យើងការពារគ្នាទាំងអស់ កាលណានៅក្បែរៗព្រះអង្គ មើលៗព្រះអង្គផង។ បើយើងដាក់សមត្ថកិច្ចទៅថាធ្វើការគំរាមអីលោក បើលោកមិនស្នើសុំ”។
ក្រោយពីមានការបាញ់សម្លាប់លោក កែម ឡី ព្រះតេជគុណ ប៊ុត ប៊ុនតិញ មានសង្ឃដីកាថាមានគេកំពុងតាមដានព្រះអង្គ។ បន្ទាប់ពីមានការបាញ់សម្លាប់លោក កែម ឡី មនុស្សមួយចំនួនដែលធ្លាប់ធ្វើការស្និទ្ធជាមួយលោក កែម ឡី បានចាកចេញពីប្រទេសកម្ពុជាដូចជាព្រះតេជគុណ សាន សុជា និងកូនភ្លោះ ជុំ ហួត ជុំ ហួរ ជាដើម៕