មេធាវីការពារក្តីឲ្យលោក គឹម សុខ គឺលោក ជួង ជួងី ឲ្យដឹងថាលោកបានដាក់ពាក្យបណ្តឹងឧទ្ធរណ៍ លោកនៅព្រឹកនេះ ប្តឹងជំទាស់ទៅនឹងដីកាសាលាដំបូងដែលឃុំខ្លួនកូនក្តីរបស់លោក។
លោក គឹម សុខ ត្រូវបានតុលាការរាជធានីភ្នំពេញប្តឹងចោទប្រកាន់ពីរបទល្មើស រួមមាន បទញុះញង់ឱ្យប្រព្រឹត្តិបទឧក្រិដ្ឋជាអាទិ៍និងបរិហាកេរ្តិ៍ ជាសាធារណៈ បន្ទាប់ពីមានបណ្តឹងពីលោក ហ៊ុន សែន។
លោកមេធាវី ជួង ជួងី ដែលត្រូវបានលោក គឹម សុខ ប្រគល់សិទ្ធិឲ្យការពារខ្លួន បានឲ្យវីអូឌីដឹងថា លោកមិនទាន់ដឹងទេថាកូនក្តីខ្លួនត្រូវរងបណ្តឹងប៉ុន្មាននោះទេ តែលោកថារដ្ឋាភិបាលក្នុងនាមជាអ្នកកាន់អំណាចសាធារណៈ មិនគួរចាប់សម្តីពលរដ្ឋសាមញ្ញម្នាក់ដោយគ្រាន់តែបញ្ចេញមតិនោះទេ។ លោកថា៖ «ខ្ញុំបានជួបគាត់ល្ងាចមិញ ហើយខ្ញុំបានពន្យល់គាត់ពីផ្លូវច្បាប់ ហើយនិងសិទ្ធិតវ៉ាតាមផ្លូវច្បាប់ថាយើងអាចតវ៉ាយ៉ាងម៉េចបាន ហើយគាត់ក៏សម្រេចប្រគល់សិទ្ធិឲ្យខ្ញុំពី២ល្ងាចមិញហ្នឹង ទីមួយ ប្រគល់សិទ្ធិឲ្យខ្ញុំប្តឹងឧទ្ធរណ៍ប្រឆាំងនឹងការឃុំខ្លួនហ្នឹង ដើម្បីទាមទារឲ្យឧទ្ធរណ៍ សម្រេចបដិសេធការឃុំខ្លួនហ្នឹង ហើយសម្រេចដោះលែងគាត់វិញ ហើយទីពីរ គាត់ប្រគល់សិទ្ធិឲ្យខ្ញុំដាក់ពាក្យបណ្តឹងសុំឲ្យគាត់បាននៅក្រៅឃុំបណ្តោះអាសន្ន»។
គួររំលឹកផងដែរថា មេធាវីការពារក្តីឲ្យលោកនាយករដ្ឋមន្ត្រី ហ៊ុន សែន គឺលោក គី តិច បានប្តឹងលោក គឹម សុខ ពីរសំណុំរឿង។ សំណុំរឿងទីមួយ ប្តឹងលោក គឹម សុខ ថាបានអត្ថាធិប្បាយចោទប្រកាន់គណបក្សប្រជាជនកម្ពុជាថា ជាអ្នកសម្លាប់លោកបណ្ឌិត កែម ឡី ដោយមិនមានមូលដ្ឋាន និងទាមទារសំណងជំងឺចិត្ត៥០ម៉ឺនដុល្លារ។ បណ្តឹងមួយករណីទៀតថា លោក គឹម សុខ បាន ចោទ រដ្ឋាភិបាលកម្ពុជាថាជាអ្នករៀបចំប្រព័ន្ធមួយ ដើម្បីសម្លាប់មនុស្ស ហើយរកមុខឃាតកមិនឃើញ និងទារប្រាក់សំណង១០លានរៀលផងដែរ៕
