កាសែតភ្នំពេញប៉ុស្ដិ៍ អះអាងថា ខ្លួនមិនប្រឈមបិទដំណើរការដូចកាសែតភាសាអង់គ្លេស ខេមបូឌា ដេលី នោះឡើយ ខណៈ ស្ថាប័នព័ត៌មានមួយនេះថា រដ្ឋាភិបាលកំពុងត្រួតពិនិត្យបញ្ហាបង់ពន្ធ។
ខណៈមានចម្ងល់ និងរបាយការណ៍សារព័ត៌មានចុះផ្សាយថា កាសែតមួយនេះអាចនឹងជួបវាសនាដូចកាសែតភាសាអង់គ្លេស ខេមបូឌា ដេលី នោះ អគ្គនាយកកាសែតភ្នំពេញប៉ុស្ដិ៍ លោក Marcus Holmes បាននិយាយក្នុងសេចក្ដីប្រកាសព័ត៌មានកាលពីម្សិលមិញថា ការចុះផ្សាយទាំងនោះ មិនឆ្លុះបញ្ចាំងការពិតទេ។
លោក Marcus Holmes បកស្រាយថា កាសែតភ្នំពេញប៉ុស្ដិ៍កំពុងធ្វើសវនកម្មពន្ធជាមួយអគ្គនាយកដ្ឋានពន្ធដារ ប៉ុន្ដែ សុំមិនបកស្រាយច្រើនពីរឿងនេះនោះទេ ដោយលោកថា ជាការសម្ងាត់របស់ក្រុមហ៊ុន។ លោកអះអាងថា រឿងបំណុលពន្ធជិត៤លានដុល្លារអាមេរិក មិនជាប់ពាក់ព័ន្ធនឹងរឿងនយោបាយ ឬជាការរិតត្បិតដល់សេរីភាពសារព័ត៌មានឡើយ។
ក្នុងសេចក្ដីប្រកាសព័ត៌មាន លោកក៏និយាយអំពីកិច្ចព្រមព្រៀងកម្ចីរបស់ស្ថាប័នកាសែតនេះ ជាមួយធនាគារពាណិជ្ជកម្មដ៏ធំមួយនៅកម្ពុជា និងថា សុំមិនធ្វើអត្ថាធិប្បាយច្រើនដូចគ្នា។
កាសែតភ្នំពេញប៉ុស្ដិ៍បានដំណើរការនៅកម្ពុជា អស់រយៈពេល២៥ឆ្នាំមកហើយ ដោយកាសែតមួយអះអាងថា ខ្លួនបានព្យាយាមផ្សាយតែព័ត៌មានពិតជូនប្រជាជនកម្ពុជា។
កាសែត ខេមបូឌា ដេលី បានសម្រេចបិទដោយខ្លួនឯងកាលពីចុងឆ្នាំ២០១៧ បន្ទាប់ពីរដ្ឋាភិបាលតម្រូវឲ្យបង់ពន្ធចំនួន៦លានដុល្លារ។ កាសែតនេះក៏បានអះអាងថា ខ្លួនមិនបានជំពាក់ពន្ធដូចការលើកឡើងរបស់រដ្ឋាភិបាលនោះទេ ហើយថា ការទារពន្ធច្រើនក៏ដោយសារតែរដ្ឋាភិបាលមិនចង់ឲ្យមានវត្តមានកាសែតនេះនៅកម្ពុជា។
