សកម្មជនបក្សកាន់អំណាចនៅស្រុកកោះអណ្តែត ខេត្តតាកែវ កាលពីថ្ងៃម្សិលមិញនេះ បានដាក់ពាក្យបណ្ដឹងទៅ គ.ជ.ប. ប្រឆាំងនឹងសកម្មជនបក្សប្រឆាំងនៅឃុំនេះ ដោយចោទថា ក្រុមសកម្មជនបក្សប្រឆាំងបានរារាំងសកម្មភាពឃោសនារបស់ពួកគេ។
ក្នុងពាក្យបណ្ដឹងដាក់ទៅ គ.ជ.ប. អនុប្រធានគណបក្សប្រជាជនកម្ពុជានៅឃុំព្រៃខ្លា អ្នកស្រី ប៉ិច ឈីម បានចោទសកម្មជនគណបក្សសង្គ្រោះជាតិ លោក កែវ អ៊ាត និងសកម្មជនដទៃ១៥នាក់ទៀតថា បានធ្វើសកម្មភាពរារាំងក្បួនដង្ហែរបស់អ្នកស្រី កាលពីម៉ោង ៨:៣០ព្រឹកថ្ងៃម្សិលមិញនេះ។
ក្នុងពាក្យបណ្ដឹងដដែលនេះ អ្នកស្រី ប៉ិច ឈីម ប្ដឹងទាមទារឲ្យផ្ដន្ទាទោសក្រុមសកម្មជនបក្សប្រឆាំង ទាមទារសំណងខូចខាត ២០លានរៀលក្នុងម្នាក់ៗ ទាមទារឲ្យបក្សប្រឆាំងនៅមូលដ្ឋានបញ្ឈប់ការដង្ហែក្បួនលើសពីមួយដងក្នុងមួយថ្ងៃ និងប្ដឹងឲ្យលុបឈ្មោះលោក កែវ អ៊ាត និងសកម្មជនដទៃទៀត ពីបញ្ជីបោះឆ្នោត៕