មន្ត្រីសេតវិមានអាមេរិក បាននិយាយនៅថ្ងៃម្សិលមិញថា ក្រុងវ៉ាស៊ីងតោន បានយល់ព្រមលើកិច្ចព្រមព្រៀងលក់សព្វាវុធជាមួយប្រទេសអារ៉ាប៊ីសាអ៊ូឌីត មានតម្លៃជិត ១១០ពាន់លានដុល្លារ អំឡុងដំណើរទស្សនកិច្ចលើកដំបូងរបស់ប្រធានាធិបតី ដូណាល់ ត្រាំ ទៅកាន់ប្រទេសសម្ព័ន្ធមិត្តចាស់វស្សា។ នេះដោយយោងតាមការផ្សាយរបស់ AFP។
មន្ត្រីសេតវិមានអាមេរិកនិយាយថា កញ្ចប់បរិក្ខា និងសេវាយោធានេះ ជួយគាំទ្រសន្តិសុខយូរអង្វែងរបស់អារ៉ាប៊ីសាអ៊ូឌីត និងតំបន់ឈូងសមុទ្រ នៅចំពោះមុខការគំរាមកំហែងពីប្រទេសអ៊ីរ៉ង់។
មន្ត្រីដដែលនោះ បានបន្ថែមថា កិច្ចព្រមព្រៀងនេះក៏នឹងជំរុញសមត្ថភាពរបស់ប្រទេសនេះ ក្នុងការចូលរួមចំណែកក្នុងប្រតិបត្តិការប្រឆាំងភេរវកម្មនៅទូទាំងតំបន់ផងដែរ ដែលកាត់បន្ថយបន្ទុកលើកងទ័ពអាមេរិក។
សេតវិមានអាមេរិកនិយាយថា លោក ត្រាំ និងរដ្ឋមន្ត្រីការបរទេស លោក Rex Tillerson នឹងចូលរួមក្នុងពិធីចុះហត្ថលេខាមួយសម្រាប់កិច្ចព្រមព្រៀងនេះ៕