បណ្ដាក្រុមហ៊ុនអាមេរិក និងអារ៉ាប៊ីសាអ៊ូឌីត បានចុះហត្ថលេខាលើកិច្ចព្រមព្រៀងមានតម្លៃរាប់រយពាន់លានដុល្លារ កាលពីថ្ងៃម្សិលមិញនេះ អំឡុងដំណើរទស្សនកិច្ចរបស់ប្រធានាធិបតី ដូណាល់ ត្រាំ ខណៈដែលក្រុងរីយ៉ាដព្យាយាមអភិវឌ្ឍសេដ្ឋកិច្ចរបស់ខ្លួនក្រៅពីការពឹងផ្អែកលើប្រេង។ នេះដោយយោងតាមការផ្សាយរបស់ Reuters។
ក្រុមហ៊ុនប្រេងជាតិអារ៉ាប៊ីសាអ៊ូឌីត Aramco បាននិយាយថា ខ្លួនបានចុះហត្ថលេខាលើកិច្ចព្រមព្រៀងមានតម្លៃ ៥០ពាន់លានដុល្លារ ជាមួយក្រុមហ៊ុនអាមេរិក។ រដ្ឋមន្ត្រីថាមពល លោក ខាលីដ អាល់ហ្វាលីហ្វ បាននិយាយថា កិច្ចព្រមព្រៀងដែលមានជាប់ពាក់ព័ន្ធនឹងក្រុមហ៊ុនទាំងអស់ មានតម្លៃសរុបដល់ទៅជាង ២០០ពាន់លានដុល្លារ ដែលភាគច្រើនត្រូវបានរៀបចំឡើងសម្រាប់ផលិតផលិតផលនានានៅក្នុងប្រទេសអារ៉ាប៊ីសាអ៊ូឌីត ដែលពីមុនត្រូវបាននាំចូល។
ក្រុមមេដឹកនាំពាណិជ្ជកម្មទាំងពីរប្រទេស បានចាត់ទុកកិច្ចពិភាក្សារបស់ពួកគេថា ជាជោគជ័យមួយ។ កិច្ចព្រមព្រៀងមួយចំនួន ត្រូវបានប្រកាសកាលពីមុនរួចមកហើយ ខណៈកិច្ចព្រមព្រៀងពាណិជ្ជកម្មដទៃទៀត គឺជាប្រភេទអនុស្សារណៈយោគយល់គ្នា ដែលនឹងតម្រូវឲ្យមានការចរចារគ្នាបន្ថែមទៀត។
ទោះជាយ៉ាងណា កិច្ចព្រមព្រៀងពាណិជ្ជកម្មទាំងនេះ ឆ្លុះបង្ហាញឲ្យឃើញពីតម្រូវការមូលធន និងបច្ចេកវិទ្យាបរទេសពីសំណាក់អារ៉ាប៊ីសាអ៊ូឌីត ខណៈដែលប្រទេសនេះព្យាយាមកាត់បន្ថយការពឹងផ្អែកលើការនាំចេញប្រេង។ តម្លៃប្រេងចុះទាបនៅក្នុងរយៈពេលប៉ុន្មានឆ្នាំចុងក្រោយនេះ ក៏បានធ្វើឲ្យសេដ្ឋកិច្ចមានកំណើនយឺតយ៉ាវផងដែរ ខណៈរដ្ឋាភិបាលប្រឈមមុខនឹងកង្វះខាតកញ្ចប់ថវិកាជាតិយ៉ាងធំ៕
