ទេសរដ្ឋមន្រ្តីក្រសួងសាធារណការ និងដឹកជញ្ជូន អះអាងថា កម្ពុជាបានខ្ចីលុយពីប្រទេសចិនជាង ២ពាន់លានដុល្លារ ដើម្បីយកមកសាងសង់ ស្ពាន និងផ្លូវ។
ថ្លែងប្រាប់អ្នកសារព័ត៌មានបន្ទាប់ពីបញ្ចប់ពិធីប្រគល់ និងទទួលសម្ភារបរិក្ខាគ្រឿងចក្រ ពីក្រុមហ៊ុនវិនិយោគដឹកជញ្ជូន ហឺណាន នៃសាធារណរដ្ឋប្រជាមានិតចិន នៅថ្ងៃសុក្រនេះ ទេសរដ្ឋមន្រ្តីក្រសួងសាធារណការ និងដឹងជញ្ជូន លោក ស៊ុន ចាន់ថុល ឲ្យដឹងថា លុយជាង ២លានដុល្លារ ដែលកម្ពុជាខ្ចីពីប្រទេសចិន គឺយកមកជុសជួលស្ពានសេកុង ព្រែកក្ដាមស្ទឹងត្រែង កោះធំ ស្ពានទឹកខ្មៅ ស្ពានជ្រោយចង្វារជាដើម។
លោកមានប្រសាសន៍ថា៖ «ប្រាក់កម្ចី យកមកសាងសង់ផ្លូវ និងស្ពាន មកពីចិនជាង២ពាន់លានដុល្លារ សហរដ្ឋអាមេរិក។ ជាង២ពាន់លាននេះ ច្រើនជាងគេ គឺមកកសាងមួយផ្លូវបាន ២ពាន់គីឡូម៉ែត ស្ពានយើងឃើញ មានស្ពានសេកុង ព្រែកក្ដាមស្ទឹងត្រែង កោះធំ ស្ពានទឹកខ្មៅ ស្ពានជ្រោយចង្វារ»។
ទំនាក់ទំនងកម្ពុជា-ចិន ត្រូវបានគេមើលឃើញថា មានភាពជិតស្និទ្ធនឹងគ្នាកាន់តែខ្លាំងនៅក្នុងរយៈពេលជាង១ទសវត្សរ៍ចុងក្រោយនេះ ដែលឆ្លុះបញ្ចាំងឲ្យឃើញតាមរយៈការផ្ដល់ជំនួយឥតសំណង កម្ចីហិរញ្ញវត្ថុ និងកំណើនទំហំពាណិជ្ជកម្មរវាងប្រទេសទាំងពីរ។
លោកនាយករដ្ឋមន្ត្រី ហ៊ុន សែន កាលពីខែកុម្ភៈកន្លងមកនេះ បានឲ្យដឹងថា គិតត្រឹមដើមឆ្នាំ២០១៧នេះ ចិនបានផ្ដល់ជំនួយឥតសំណង និងកម្ចីសម្បទានដល់ទៅ ៤ ២០០លានដុល្លារ សម្រាប់អភិវឌ្ឍវិស័យហេដ្ឋារចនាសម្ព័ន្ធ កសិកម្ម សុខាភិបាល អប់រំ និងសន្តិសុខសង្គមជាដើម៕