វិទ្យាស្ថានសម្រាប់ការវិភាគលើគោលនយោបាយនៃជម្លោះ(IPAC) បានបង្ហាញលទ្ធផលនៃការស្រាវជ្រាវថា បើសិនជាការផ្ទុះអាវុធរវាងរដ្ឋាភិបាល និង ក្រុមបះបោរនៅភាគខាងត្បូងហ្វីលីពីនអូសបន្លាយយូរតទៅទៀតនោះ នឹងនាំឲ្យក្រុមជ្រុលនិយមធ្វើសកម្មភាពគំរាមកំហែងដល់ប្រទេសផ្សេងៗទៀត។
ផលប៉ះពាល់នៃការអូសបន្លាយជម្លោះប្រដាប់អាវុធនៅភាគខាងត្បូងហ្វីលីពីននោះ នឹងអាចបណ្តាលឲ្យមានការវាយប្រហារនៅទីក្រុងផ្សេងទៀតនៃប្រទេសហ្វីពីលីពីន ហើយរាលដាលក្រុមបះបោរទាំងនោះវាយប្រហារដល់ប្រទេសជិតខាងទៀតរួមទាំងប្រទេសម៉ាឡេស៊ី និង ប្រទេសឥណ្ឌូនេស៊ី ដែលបច្ចុប្បន្នកំពុងរងការគំរាមកំហែងពីពួកក្រុមជ្រុលនិយមស្រាប់នោះ។ នេះបើតាមសារព័ត៌មានChannel News Asia។
ការសិក្សាបានបង្ហាញថា កាលណាជម្លោះប្រដាប់អាវុធនៅទីនោះកាន់តែអូសបន្លាយយូរនោះ នឹងធ្វើឲ្យក្រុមបះបោរឬ ពួកជ្រុលនិយមនៅអាស៊ីអាគ្នេយ៍ចងសម្ព័ន្ធសហការគ្នា នឹងបង្កើតមេដឹកនាំថ្មីសម្រាប់ធ្វើសកម្មភាពនៅម៉ាឡេស៊ី និង ឥណ្ឌូនេស៊ី ដែលមានការរៀបចំពីពួកក្រុមIS។
វិទ្យាស្ថានសម្រាប់ការវិភាគលើគោលនយោបាយនៃជម្លោះលើកឡើងថា បញ្ហាប្រឈមនៅទីក្រុងម៉ារាវី នៅភាគខាងត្បូងហ្វីលីពីនមិនទាន់បញ្ចប់នៅឡើយទេ ក្រោយពេលដែលក្រុមយោធារដ្ឋាភិបាលប្រកាសថាទទួលបានជ័យជម្នះ។
ការសិក្សាបានបង្ហាញទៀតថា ក្រុមបះបោរប្រដាប់អាវុធនៅភាគខាងត្បូងហ្វីលីពីន បានទទួលលុយឧត្ថម្ភផ្ទាល់ពីក្រុមIS ហើយបានបង្ហាញថា ខ្សែបណ្តាញរបស់ក្រុមនេះកំពុងដំណើរពីរស៊ីរីទៅប្រទេសហ្វីលីពីនទៅប្រទេសឥណ្ឌូនេស៊ី និង បណ្តាលប្រទេសមួយចំនួនទៀត។
