សំណើរបស់កូរ៉េខាងត្បូងដែលចង់ឲ្យមានការពិភាក្សាជាមួយកូរ៉េខាងជើងផ្នែកយោធានៅថ្ងៃសុក្រនេះ ដើម្បីបន្ថយភាពតានតឹងនោះ ត្រូវបានបរាជ័យបន្ទាប់ពីកូរ៉េខាងជើងមិនបានឆ្លើយតប ធ្វើឲ្យគោលនយោបាយចង់បញ្ចប់ភាពតានតឹងរវាងកូរ៉េទាំងពីររបស់ប្រធានាធិបតីកូរ៉េខាងត្បូងបាត់បង់ក្តីសង្ឃឹម។
កូរ៉េខាងជើងនៅតែរក្សាភាពស្ងៀមស្ងាត់បន្ទាប់ពីកូរ៉េខាងត្បូងស្នើឡើងកាលពីថ្ងៃចន្ទដើមសប្តាហ៍នេះ ដើម្បីចរចាផ្នែកយោធានៅថ្ងៃសុក្រនេះ ជៀសវាងផ្ទុះអាវុធនៅតាមបណ្តោយព្រំដែន។នេះបើតាមទីភ្នាក់ងារព័ត៌មានរ៉យទ័រ។
ប្រធានាធិបតីថ្មីរបស់កូរ៉េខាងត្បូងលោក មូន ជែអ៊ីន បានឡើងកាន់តំណែងកាលពីខែឧសភា ហើយបានសន្យាថា នឹងភ្ជាប់ការចរចាជាមួយកូរ៉េខាងជើង ស្របពេលកូរ៉េខាងត្បូងកំពុងរងសម្ពាធពីកូរ៉េខាងជើងដោយសារតែការបាញ់សាកល្បងអាវុធមីស៊ីល និង អាវុធនុយក្លេអ៊ែជាបន្តបន្ទាប់។
ការស្នើឡើងដើម្បីពិភាក្សានេះគឺបន្ទាប់ពី កូរ៉េខាងជើងបានបាញ់សាកល្បងអាវុធមីស៊ីលឆ្លងទ្វីបកាលពីថ្ងៃទី៤ខែកក្កដា ហើយប្រកាសថា នេះជាបច្ចេកវិទ្យាថ្មីដែលអាចនាំក្បាលគ្រប់នុយក្លេអ៊ែបាញ់ដល់សហរដ្ឋអាមេរិក។
អ្នកនាំពាក្យក្រសួងការពារជាតិរបស់កូរ៉េខាងត្បូងលោក Moon Sang-gyun ថ្លែងថា ការស្នើចរចាផ្នែកយោធានៅព្រឹកថ្ងៃសុក្រនេះមិនអាចដំណើរការបានទេ ដោយសារតែកូរ៉េខាងជើងមិនបានឆ្លើយតប។