អតីតមេដឹកនាំគណបក្សប្រឆំាងអះអាងថា នឹងឈរពីក្រោយបក្សប្រជាជនកម្ពុជា ដោយថា បើច្បាប់ស្តីពីគណបក្សនយោបាយ ដែលបង្កើតឡើងដោយមានតែវត្តមានតំណាងរាស្ត្របក្សកាន់អំណាចនោះ ចូលជាធរមាន។
កាលពីថ្ងៃទី១៨ខែកក្កដាឆ្នាំ២០១៧ ព្រឹទ្ធសភាកម្ពុជាបានប្រជុំពេញអង្គ ដោយតំណាងរាស្ត្រគណបក្សប្រជាជនកម្ពុជា បានយល់ព្រមអនុម័តសេចក្តីស្នើច្បាប់ ស្តីពីគណបក្សនយោបាយ ដោយគ្មានវត្តមានសមាជិកព្រឹទ្ធសភាពីបក្សប្រឆាំងចូលរួម ខណៈសេចក្តីស្នើច្បាប់នេះ ទំនងធ្វើតាមការចង់បានរបស់លោកនាយករដ្ឋមន្ត្រី ហ៊ុន សែន ដោយថា ដើម្បីពង្រឹងនីតិរដ្ឋ និងសុខសន្តិភាពជូនប្រជាពលរដ្ឋ ទប់ស្កាត់សង្គ្រាមពាក្យសំដី។
ក្នុងកិច្ចសម្ភាសន៍ជាមួយវិទ្យុអាស៊ីសេរីកាលពីថ្ងៃទី២០កក្កដាម្សិលមិញ អតីតមេដឹកនាំគណបក្សសង្គ្រោះជាតិលោក សម រង្ស៊ី ដែលកំពុងនិរន្ទេសខ្លួនទៅក្រៅប្រទេស បានប្រតិកម្មទៅនឹងសមាជិកព្រឹទ្ធសភា មកពីគណបក្សកាន់អំណាច ថាបាន បើកកិច្ចប្រជុំអនុម័តច្បាប់ស្តីពីគណបក្សនយោបាយជាលើកទី២នោះថា សំដៅដល់រូបលោក ដោយមិនឲ្យបញ្ចេញមតិគំាទ្រគណបក្សនយោបាយ ដែលខ្លួនពេញចិត្ត និងឈានដល់ការរំលាយបក្សនោះចោលទៀតផង។
ករណីនេះ លោក សម រង្ស៊ី ថា បើច្បាប់នេះ ចូលជាធរមាន លោកនឹងឈរពីក្រោយគណបក្សកាន់អំណាច។
លោកថ្លែងថា៖ «ខ្ញុំនឹងនិយាយពីបញ្ហាប្រទេសជាតិ បើថា មានគណបក្សណាគេធ្វើល្អ ដូចថាគណបក្សប្រជាជន ថ្ងៃណាមួយភ្ញាក់ខ្លួន ចេះកែតម្រូវខ្លះ ខ្ញុំនឹងសសើរគណបក្សប្រជាជន ហើយបើខ្ញុំឃើញមានធ្វើល្អពីរដង បីដង ខ្ញុំនឹងសសើររហូត បើគណបក្សប្រជាជនបដិសេធ គណបក្សប្រជាជនគេរំលាយគណបក្សប្រជាជនខ្លួនគេទៅ…អាច ខ្ញុំសសើរគណបក្សប្រជាជន សសើរពីរដង បីដង ប្រយ័ត្នគណបក្សប្រជាជនយកច្បាប់ហ្នឹង [ច្បាប់ស្តីពីគណបក្សនយោបាយ] ត្រូវតែរំលាយខ្លួនឯង បើចំាតែពាក្យសម្តីរបស់ខ្ញុំ ប្រយ័ត្នរត់តាមខ្ញុំអត់ទាន់»។
អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា លោកមិនចាប់អារម្មណ៍នឹងការលើកឡើងរបស់លោក សម រង្ស៊ី នោះទេ ដោយលោកថា ច្បាប់ស្តីពីគណបក្សនយោបាយនេះនិងចូលជាធរមាននាពេលឆាប់ៗខាងមុខនេះ។ លោកថា លោក សម រង្ស៊ី មិនមានឥទ្ធិពល ធ្វើឲ្យបក្សកាន់អំណាចត្រូវបានរំលាយនោះទេ។
លោកនិយាយថា៖ «ច្បាប់នេះ គ្មាននិយាយចំឈ្មោះ សម រង្ស៊ី ទេ គេនិយាយថា ទណ្ឌិតដែលជាប់ថ្នាក់ មជ្ឈិម និងថ្នាក់ឧក្រិដ្ឋ មិនមែនតែចំពោះលោក សម រង្ស៊ី ឯណា គេដៅតែជាមួយគណបក្សមិនឲ្យទាក់ទងជា មួយទណ្ឌិតតែប៉ុណ្ណោះ អ្នកណាក៏ដឹងដែរ មានរឿងអីមកផ្សារភ្ជាប់ជាមួយគណបក្សប្រជាជន ដើម្បីឲ្យគេរំលាយគណបក្សប្រជាជនកើត អត់ទេ ធ្លាប់ប្រឆំាងហើយ ដូច្នេះ ខ្លួនឯង មកធ្វើជាឧប្បាយកល បើពាក្យឧប្បាយកល មិនមែនជារឿងធម្មតាឯណា ជារឿងល្បិច ព្រោះអ្នកឯងប្រើល្បិចធ្វើអញ្ចឹង នរណាគេមិនដឹង»។
តំណាងរាស្ត្រមួយរូប និងជាកូនប្រុសលោក ហ៊ុន សែន ក៏ធ្លាប់ស្នើឲ្យសភាតាមដានពីប្រសិទ្ធភាពនៃការអនុវត្តច្បាប់ស្តីពីគណបក្សនយោបាយ ខណៈលោក សម រង្ស៊ី បន្តរិះគន់ការអនុម័តច្បាប់នេះថាជា «សភាទីងមោង»។
កាលពីម្សិលមិញ គណបក្សសង្រ្គោះជាតិ បានថ្វាយលិខិតមួយថ្វាយព្រះមហាក្សត្រ ក្នុងន័យស្នើកុំឲ្យព្រះមហាក្សត្រឡាយព្រះហស្ថលេខាលើច្បាប់ស្តីពីគណបក្សនយោបាយនោះ ដោយថា មាត្រាខ្លះនៃច្បាប់នេះ ជាគោលដៅប្រឆាំងលោក សម រង្ស៊ី តែម្នាក់ និងថាផ្ទុយទៅនឹងគោលការណ៍ប្រជាធិបតេយ្យសេរីពហុបក្ស ដែលធានាដោយរដ្ឋធម្មនុញ្ញ។
សាស្ត្រាចារ្យនយោបាយលោក សូ ចន្ថា យល់ថា ច្បាប់ស្តីពីគណបក្សនយោបាយនេះ បង្កើតឡើងដើម្បីផាត់លោក សម រង្ស៊ី ចេញពីឆាកនយោបាយ។ លោកថា ទោះជាច្បាប់នេះចូលជាធរមាន ក៏ការអនុវត្តច្បាប់នេះអាចនឹងមានភាពលម្អៀង ដោយថា កន្លងទៅការអនុវត្តច្បាប់នៅកម្ពុជាមានស្តង់ដារពីររវាងអ្នកគំា ទ្របក្សកាន់អំណាច និងអ្នកគំាទ្របក្សប្រឆំាង។
លោកយល់ថា៖ «យើងរង់ចំាមើល ពីប្រសិទ្ធិភាពនៃការអនុវត្តច្បាប់ទៅវិញ ព្រោះកន្លងមក យើងឃើញហើយ ការអនុវត្តច្បាប់នៅកម្ពុជាមានស្តង់ដារពីរ ជាពិសេសអ្នកទោសនយោបាយ ដែលមាននៅកម្ពុជានោះ មានន័យថា កន្លងមក អ្នកដែលគំាទ្របក្សប្រឆំាងច្រើនតែជួបបញ្ហា រីឯអ្នកគំាទ្របក្សកាន់អំណាច ហាក់ដូចជាច្បាប់មិនបានដាក់ទោសទណ្ឌ ឬក៏មានទោសស្រាលជាដើម»។
ក្នុងពិធីរំលឹកខួបអនុស្សាវរីយ៍៦៦ឆ្នាំ នៃការបង្កើតគណបក្សប្រជាជនកម្ពុជា កាលពីចុងខែមិថុនាកន្លងទៅ លោកនាយករដ្ឋមន្ត្រី ហ៊ុន សែន បានស្នើឲ្យរដ្ឋសភាធ្វើការកែច្បាប់គណបក្សនយោបាយជាលើកទី២។
អ្នកនាំពាក្យតំណាងរាស្ត្រគណបក្សប្រជាជន លោក ឈាង វុន អះអាងថា ច្បាប់នេះនឹងរារាំងមិនឲ្យមានការដាក់តាំងរូបលោក សម រង្ស៊ី នៅទីសាធារណៈដូចមុនៗទេ ដោយលោកចាត់ទុកលោក សម រង្ស៊ី ជាទណ្ឌិត។ លោក ឈាង វុន បង្ហើបថា ច្បាប់នោះក៏នឹងទប់ស្កាត់មិនឲ្យមហាអំណាចណាមួយប្រើឥទ្ធិពល នាំលោក សម រង្ស៊ី ចូលកម្ពុជាវិញផងដែរ។
ច្បាប់គណបក្សនយោបាយ ដែលបានអនុម័តកាលពីឆ្នាំ១៩៩៧ ត្រូវបានស្នើធ្វើវិសោធនកម្មឡើងវិញម្តងហើយ ដោយលោក ហ៊ុន សែន កាលពីចុងខែមករាឆ្នាំ២០១៧ និងត្រូវបានចូលជាធរមាន បន្ទាប់ពីបានចុះហត្ថលេខា កាលពីថ្ងៃទី៧ខែមីនា ដោយលោក សាយ ឈុំ ប្រធានព្រឹទ្ធសភានិងជាប្រមុខរដ្ឋស្តីទី ជំនួសព្រះមហាក្សត្រ ដែលបានយាងទៅចិន៕