ប្រព័ន្ធផ្សព្វផ្សាយកូរ៉េខាងជើង កាលពីថ្ងៃម្សិលមិញ បានចោទប្រកាន់អ្នកកាទូតម្នាក់ដែលបានចុះចូលនឹងកូរ៉េខាងត្បូង ថាបានរត់គេចចេញពីការផ្ដន្ទាទោសចំពោះបទល្មើសជាច្រើន ក្នុងនោះមានបទល្មើសរំលោភសេពសន្ធវៈកុមារផងដែរ ដែលនាំឲ្យក្រុងព្យុងយ៉ាងស្វែងរកការធ្វើបត្យាប័នអ្នកកាទូតរូបនោះ។ នេះដោយយោងតាមការផ្សាយបន្តរបស់ទីភ្នាក់ងារព័ត៌មាន Reuters។
ទីភ្នាក់ងារព័ត៌មាន Reuters បានដកស្រង់វិចារណកថាមួយរបស់ទីភ្នាក់ងារព័ត៌មានកូរ៉េខាងជើង KCNA ដែលពុំបានបង្ហាញឈ្មោះអ្នកកាទូតរូបនោះទេ ប៉ុន្តែ កាលពីថ្ងៃពុធកន្លងមកនេះ កូរ៉េខាងត្បូង បានប្រកាសថា លោក ថែ យ៉ុងហូ ដែលជាអគ្គរដ្ឋទូតរងកូរ៉េខាងជើងប្រចាំទីក្រុងឡុងដ៍ បានទៅដល់ប្រទេសកូរ៉េខាងត្បូងជាមួយក្រុមគ្រួសាររបស់គាត់។
យោងតាមរដ្ឋាភិបាលកូរ៉េខាងត្បូង លោក ថែ គឺជាអ្នកកាទូតថ្នាក់ខ្ពស់ដែលបានផ្ដាច់ខ្លួនពីក្រុងព្យុងយ៉ាង ហើយចុះចូលនឹងកូរ៉េខាងត្បូង។
ទីភ្នាក់ងារព័ត៌មានកូរ៉េខាងជើងបាននិយាយថា ជនរត់គេចខ្លួននេះ ត្រូវកោះហៅកាលពីខែមិថុនា ឲ្យចូលបំភ្លឺការកិបកេងមូលនិធិរដ្ឋដ៏ច្រើន លក់កិច្ចការសម្ងាត់របស់រដ្ឋ និងរំលោភផ្លូវភេទកុមារ។
ទីភ្នាក់ងារព័ត៌មានដដែលនេះ បាននិយាយថា កូរ៉េខាងជើង បានប្រាប់ក្រុងឡុងដ៍ អំពីអ្វីដែលក្រុងព្យុងយ៉ាងនិយាយថា គឺជាបទល្មើសរបស់លោក ថែ ហើយស្នើឲ្យក្រុងឡុងដ៍បញ្ជូនលោក ថែ ទៅឲ្យក្រុងព្យុងយ៉ាង។
ផ្ទុយទៅវិញ KCNA បានផ្សាយថា អង់គ្លេសបានធ្វើឲ្យខូចឈ្មោះខ្លួនឯងក្នុងឋានៈជាប្រទេសគោរពច្បាប់មួយ តាមរយៈការប្រគល់ជនរត់គេចខ្លួនរូបនោះដោយគ្មានលិខិតឆ្លងដែន ទៅកាន់របបអាយ៉ង់កូរ៉េខាងត្បូង និងពុំបានបំពេញកាតព្វកិច្ចរបស់ខ្លួន ដើម្បីការពារអ្នកកាទូតដែលរស់នៅក្នុងប្រទេសរបស់ខ្លួន។
អ្នកនាំពាក្យក្រសួងការបរទេសអង់គ្លេស ពុំបានថ្លែងអ្វីៗភ្លាមដែរ។ លោក ថែ និងក្រុមគ្រួសាររបស់លោក ស្ថិតនៅក្រោមការការពាររបស់រដ្ឋាភិបាលកូរ៉េខាងត្បូង ហើយមិនអាចទាក់ទងសុំការបកស្រាយបានទេ៕