ប្រធានាធិបតីហ្វីលីពីន លោក Rodrigo Duterte បានតវ៉ាទៅនឹងអង្គការសហប្រជាជាតិ នៅថ្ងៃអាទិត្យនេះ បន្ទាប់ពីស្ថាប័នកំពូលមួយនេះ អំពាវនាវឲ្យបញ្ចប់ការបាញ់សម្លាប់មនុស្សនៅក្នុងសង្គ្រាមប្រឆាំងគ្រឿងញៀនរបស់លោក ដោយនិយាយថា លោកអាចចាកចេញពីអង្គការកំពូលមួយនេះ ហើយអញ្ចើញចិន និងប្រទេសដទៃទៀត ឲ្យបង្កើតអង្គការថ្មីមួយ។
ទីភ្នាក់ងារព័ត៌មាន Reuters បានផ្សាយថា អ្នកជំនាញសិទ្ធិមនុស្សអង្គការសហប្រជាជាតិ ២រូប កាលពីសប្ដាហ៍មុន បានជំរុញឲ្យក្រុងម៉ានីលបញ្ឈប់ការកាត់ទោសមនុស្សក្រៅប្រព័ន្ធតុលាការ និងការសម្លាប់មនុស្ស ដែលចេះតែបន្តកើនឡើង ចាប់តាំងពីលោកបានឈ្នះការបោះឆ្នោតប្រធានាធិបតី តាមរយៈការសន្យាបោសសម្អាតគ្រឿងញៀន កាលពីខែឧសភាកន្លងមក។
យោងតាម Reuters ជនសង្ស័យជាអ្នកជួញដូរគ្រឿងញៀនប្រហែល ៩០០នាក់ហើយ ត្រូវបានគេសម្លាប់ ចាប់តាំងពីលោក Duterte ចូលកាន់អំណាច ក្រោយឈ្នះការបោះឆ្នោតកាលពីថ្ងៃទី០៩ ខែឧសភា កន្លងមក។
លោក Duterte កាលពីថ្ងៃសុក្រកន្លងមក បានបដិសេធថា រដ្ឋាភិបាលមិនទទួលខុសត្រូវនោះឡើយ ហើយនៅក្នុងសន្និសីទសារព័ត៌មាននៅឯស្រុកកំណើតរបស់គាត់នៅទីក្រុង Davao លោក Duterte បាននិយាយថា ប៉ូលិសមិនមែនជាអ្នកសម្លាប់អ្នកទាំងនោះទេ ហើយលោកបានអញ្ចើញអ្នកជំនាញអង្គការសហប្រជាជាតិ ឲ្យទៅស៊ើបអង្កេតដោយខ្លួនឯង។
សន្និសីទសារព័ត៌មាននោះ ត្រូវបានផ្សព្វផ្សាយដោយប្រព័ន្ធផ្សព្វផ្សាយក្នុងស្រុក ហើយមានបង្ហោះនៅលើទំព័រហ្វេសប៊ុក GMA ផងដែរ។
លោក Duterte ថ្លែងថា៖ «ខ្ញុំនឹងបង្ហាញទៅពិភពលោកថា អ្នកគឺជាអ្នកជំនាញឆ្កួតណាស់»។ លោកបានជំរុញឲ្យអ្នកជំនាញទាំងពីររូបនោះ កុំឲ្យរាប់ត្រឹមចំនួនអ្នកស្លាប់ពាក់ព័ន្ធនឹងគ្រឿងញៀន ប៉ុន្តែ ក៏ត្រូវរាប់បញ្ចូលទាំងជីវិតជនស្លូតត្រង់ដែលបាត់បង់ដោយសារគ្រឿងញៀន។
លោក Duterte បន្ទាប់មក បានចាប់ផ្ដើមវាយប្រហារទៅលើអង្គការសហប្រជាជាតិ និងសមាជិករបស់ខ្លួន ក្នុងនោះមានក្រុងវ៉ាស៊ីងតោន ដែលជាសម្ព័ន្ធជិតស្និទ្ធរបស់ក្រុងម៉ានីល ផងដែរ ដោយលោកនិយាយថា អង្គការសហប្រជាជាតិ មិនអាចបំពេញអាណត្តិរបស់ខ្លួនបានទេ ប៉ុន្តែ កំពុងព្រួយបារម្ភអំពីគំនរឆ្អឹងរបស់ឧក្រិដ្ឋជន។
លោកថ្លែងថា៖ «ខ្ញុំមិនចង់ជេរអ្នកទេ។ ប៉ុន្តែ យើងអាចនឹងត្រូវសម្រេចចិត្តផ្ដាច់ខ្លួនពីអង្គការសហប្រជាជាតិ។ ហេតុអ្វីអ្នកត្រូវស្ដាប់អ្នកជំនាញឆ្កួតៗនេះ?»។
ដោយបានរិះគន់ទៅលើអង្គការសហប្រជាជាតិ ថាមិនបានខិតខំដោះស្រាយភាពស្រេកឃ្លាន និងអំពើភេរវកម្ម និងមិនអាចធ្វើអ្វីនៅស៊ីរី និងអ៊ីរ៉ាក់ និងអនុញ្ញាតឲ្យពួកមហាអំណាចទម្លាក់គ្រាប់បែកកម្ទេចភូមិស្រុក និងសម្លាប់ជនស៊ីវិលស្លូតត្រង់នោះ លោក Duterte ថ្លែងថា លោកនឹងអញ្ចើញចិន និងប្រទេសនៅអាហ្វ្រិក ឲ្យបង្កើតអង្គការសកលមួយទៀត៕
