នាយករដ្ឋមន្ត្រីកម្ពុជាមានប្រសាសន៍ថា គណបក្សប្រឆាំងបានធ្វើនយោបាយសម្លាប់កម្មករ ដោយថាការអំពាវនាវផ្សេងៗ ទៅដល់សហគមន៍អឺរ៉ុប ឲ្យឈប់ទទួលការនាំចូលទំនិញពីកម្ពុជា និងការទាមទារឲ្យក្រុមកម្មករចេះប្រើប្រាស់សិទ្ធិនានា ជានយោបាយដែលកំពុងតែសម្លាប់កម្មករកម្ពុជា។
នៅក្នុងពិធីជួបសំណេះសំណាលជាមួយកម្មករជិត៤ពាន់នាក់ កាលពីថ្ងៃ២០សីហាម្សិលមិញ លោកនាយករដ្ឋមន្ត្រី ហ៊ុន សែន បញ្ជាក់ថា ការធ្វើនយោបាយរបស់បក្សប្រឆាំង គឺជានយោបាយដែលសម្លាប់កម្មករ ដោយថា រាល់ការថ្លែងសារ និងការជម្រុញផ្សេងៗ របស់គណបក្សនេះ សុទ្ធតែជាអ្វីដែលធ្វើឲ្យកម្មករបាត់បង់ការងាររបស់ខ្លួន។
លោកមានប្រសាសន៍ថា៖ «ឥឡូវទៅសួរពួកប្រឆាំងទៅ តើគេបានធ្វើរឿងហ្នឹងពិតឬអត់? សុំកុំផ្តល់ជំនួយដើរទៅសុំគ្រប់កន្លែង សុំកុំធ្វើការវិនិយោគដើរនិយាយគ្រប់កន្លែង រហូតចុងក្រោយទៅសុំសហភាពអឺរ៉ុប កុំឲ្យទិញទំនិញពីកម្ពុជា អាហ្នឹងបីកុំ ឯបីទារ ទារអី? ទីមួយ ទារឲ្យដូរ ទីពីរ ទារឡើងប្រាក់ខែ ទីបី ទារធ្វើបាតុកម្ម។ បីកុំ បីទារ ឥឡូវទ្រឹស្តីវាអញ្ចឹង ហើយយកទៅនិយាយជាមួយពួកប្រឆាំងទៅ! ពួកប្រឆាំងចេះប៉ុនហ្នឹង។ រួចហើយក្មួយៗមួយចំនួន ទៅចាញ់បោកគេទៅទៀត! ដោយសារបក្សប្រឆាំងទារបានអញឡើងប្រាក់ខែ នែកទៅឆ្កុយអញ្ចឹងទៅ អាឯងនេះ ប្រឹងចង់ស្លាប់!»។
កាលពីខែកក្កដាឆ្នាំ២០១៦ មានការផ្សព្វផ្សាយមួយចំនួន បានផ្សព្វផ្សាយថា លោក សម រង្ស៊ី ដែលកាលនោះ ជាប្រធានគណបក្សសង្គ្រោះជាតិ បានថ្លែងទៅកាន់សមាជិកសភាសហភាពអឺរ៉ុប ដោយស្នើឲ្យប្រទេសនៅសហភាពអឺរ៉ុបទាំងនោះ ឈប់នាំចូលសម្លៀកបំពាក់ពីកម្ពុជា។ ករណីនេះ លោក សម រង្ស៊ី បានចេញមុខច្រានចោលការផ្សព្វផ្សាយទាំងនោះ ដោយថា លោកមិនបានថ្លែងដូចការចុះផ្សាយទាំងនោះទេ។
អ្នកនាំពាក្យគណបក្សសង្គ្រោះជាតិលោក យឹម សុវណ្ណ មានប្រសាសន៍ប្រាប់វីអូឌីថា គោលនយោបាយរបស់គណបក្សសង្គ្រោះជាតិគ្មានចេតនា ឬគោលបំណងណាមួយ ក្នុងការបំផ្លាញប្រយោជន៍របស់ប្រជាពលរដ្ឋកម្ពុជានោះទេ។
លោកមានប្រសាសន៍បន្ថែមថា ប្រសិនជាគណបក្សប្រឆាំងធ្វើនយោបាយខុសមែននោះ គួរណាស់តែគណបក្សប្រជាជន ចូលរួមធ្វើច្បាប់ ដែលអាចអនុញ្ញាត្តិឲ្យពលករខ្មែរនៅក្រៅប្រទេស អាចបោះឆ្នោតបានផង។
លោកថា៖ «យើងមិនបានធ្វើខុសដូចដែលអ្វី ដែលគាត់និយាយនោះទេ គឺប្រជាពលរដ្ឋគាត់បានធ្វើការវាយតម្លៃ ផ្តល់សេចក្តីទុកចិត្តផ្តល់ការគាំទ្រម្តងៗ ហ្នឹងហើយ។ ទីពីរ បើគាត់មានជំនឿរថា គណបក្សសង្គ្រោះជាតិធ្វើខុស គួរណាស់តែ គាត់រៀបចំ ធ្វើម៉េចរៀបចំ សហការតំណាងរាស្ត្រគណបក្សទាំងពីរហ្នឹងរៀបចំ ឲ្យកម្មករប្រទេសជាងពីរលាននាក់ហ្នឹងទៅ បោះឆ្នោតបានផងទៅ ព្រោះគេនឹងបោះឲ្យអ្នកដែលធ្វើល្អ គេមិនបោះឲ្យអ្នកដែលធ្វើមិនល្អនោះទេ! កាលណាធ្វើល្អ ហើយគណបក្សប្រជាជនមានជំនឿថាអាចហ្នឹងមានការគាំទ្រអញ្ចឹង អញ្ចឹងខ្ញុំសុំឲ្យបន្ថែមការចាប់អារម្មណ៍ ដល់កម្មករជិតពីរលាននាក់ហ្នឹងបោះឆ្នោតបានផងទៅ»។
របាយការណ៍ចុងក្រោយនៃបេឡាជាតិរបបសន្តិសុខសង្គម បង្ហាញថា កម្មករដែលធ្វើការក្នុងវិស័យកាត់ដេរសព្វថ្ងៃមានចំនួន៨០ម៉ឺននាក់ នៅក្នុងក្រុមហ៊ុនរោងចក្រកាត់ដេរចំនួនជាង១០០០។
នៅក្នុងជំនួបជាមួយក្រុមកម្មករជាលើកដំបូង កាលពីម្សិលមិញ លោកនាយករដ្ឋមន្ត្រី ហ៊ុន សែន ក៏បានប្រកាសថា នៅឆ្នាំ២០១៨ខាងមុខ ប្រាក់ឈ្នួលអប្បបរមារបស់កម្មករ គឺអាចឡើងដល់១៦៨ដុល្លារក្នុងមួយខែ នឹងក្រុមកម្មករ ក៏នឹងទទួលបានសេវាធានារ៉ាប់រងសុខភាព ពីម្ចាស់ក្រុមហ៊ុន រួមទាំងទទួលបានសេវាជិះរថយន្តក្រុងសាធារណៈដោយឥតគិតថ្លៃសម្រាប់រយៈពេល២ឆ្នាំផងដែរ៕
