យន្តហោះទម្លាក់គ្រាប់បែកអាមេរិកមួយគ្រឿងបានចុះចតនៅកូរ៉េខាងត្បូងនៅថ្ងៃពុធនេះ ដែលជាការបង្ហាញឥទ្ធិពលកងទ័ពរបស់ខ្លួន ដែលអាមេរិកនិយាយថាជាការរំលឹកដល់ក្រុងព្យុងយ៉ាងអំពីសព្វាវុធដ៏ខ្លាំងក្លារបស់ខ្លួននៅក្នុងតំបន់។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
AFP បានបន្ថែមថា ការសម្រេចចិត្តបែបនេះបានកើតឡើងមួយថ្ងៃក្រោយពីកូរ៉េខាងជើងបានអះអាងថា ខ្លួនទទួលបានជោគជ័យក្នុងការសាកល្បងម៉ាស៊ីនគ្រាប់រ៉ុកកែតដ៏ខ្លាំងមួយ ដែលកូរ៉េខាងត្បូងថាវាត្រូវបានគេអភិវឌ្ឍឡើង ដើម្បីបង្ហាញពីវឌ្ឍនភាពឆ្ពោះទៅរកការសម្រេចបានគ្រាប់មីស៊ីរយៈចម្ងាយឆ្ងាយ។
រូបភាពទូរទស្សន៍បានបង្ហាញនូវយន្តហោះទម្លាក់គ្រាប់បែកល្បឿនលឿន B-1B Lancer ចំនួន២គ្រឿងបានបន្ទាបខ្លួនចុះនៅលើមូលដ្ឋានកងទ័ពអាកាសអាមេរិកនៅអូសាន ស្ថិតនៅចម្ងាយ៦៤គីឡូម៉ែត្រ ភាគខាងត្បូងទីក្រុងសេអ៊ូល។
ទីភ្នាក់ងារយ៉ុនហាប់របស់កូរ៉េខាងត្បូងផ្សាយថា យន្តហោះទម្លាក់គ្រាប់បែកមួយគ្រឿងបានហោះត្រឡប់ទៅមូលដ្ឋានកងទ័ពអាកាសអាមេរិក នៅឯកោះហ្គាមវិញហើយ ខណៈមួយគ្រឿងទៀត បានចុះចតនៅមូលដ្ឋានអូសាននោះ៕