ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ បានប្រកាសកាលពីថ្ងៃម្សិលមិញពីទីក្រុងប៉េកាំង ពី “ការចែកផ្លូវគ្នា” ពីសម្ព័ន្ធមិត្តចាស់វស្សាអាមេរិក ខណៈដែលមេដឹកនាំរូបនេះ កំពុងកសាងតុល្យភាពកាទូតប្រទេសរបស់លោក តម្រង់ឆ្ពោះទៅរកប្រទេសចិន។
ការប្រកាសដូច្នេះរបស់លោក ឌូទើតេ ត្រូវបានទីភ្នាក់ងារព័ត៌មាន AFP ដកស្រង់សម្ដីយកមកចុះផ្សាយ ខណៈដែលមេដឹកនាំហ្វីលីពីនរូបនេះ កំពុងស្ថិតក្នុងដំណើរទស្សនកិច្ចរយៈពេល ៤ថ្ងៃ នៅប្រទេសចិន។
លោក ឌូទើតេ បានថ្លែងពីទីក្រុងប៉េកាំងថា៖ “ខ្ញុំសូមប្រកាសពីការចែកផ្លូវរបស់ខ្ញុំពីសហរដ្ឋអាមេរិក។ អាមេរិកមិនមែនជាអ្នកគ្រប់គ្រងជីវិតយើងនោះឡើយ”។ លោកបន្តថា៖ “តើអ្នកឯងក្លាយជាប្រទេសមហាអំណាចឧស្សាហកម្មខ្លាំងបំផុតយ៉ាងម៉េច នៅពេលអ្នកឯងជំពាក់លុយចិន ហើយអ្នកឯងមិនសងគេផង?”។
លោក ឌូទើតេ ថ្លែងដូច្នេះ បន្ទាប់ពីលោកបានជួបជាមួយសមភាគីចិន លោកប្រធានាធិបតី ស៊ី ជិនពីង នៅឯមហាវិមានប្រជាជន នៅទីលានធៀនអានមេន ដោយមេដឹកនាំទាំងពីរសន្យាពង្រឹងទំនុកចិត្ត និងមិត្តភាព ខណៈមេដឹកនាំទាំងពីរព្យាយាមមិននិយាយដល់បញ្ហាជម្លោះដែនទឹកនោះឡើយ។
លោក ស៊ី បានចាត់ប្រទេសទាំងពីរជា “អ្នកជិតខាងរំលងសមុទ្រ” ដោយគ្មានហេតុផលអ្វីដែលត្រូវប្រទូសសរ៉ាយ ឬប្រឈមមុខដាក់គ្នានោះឡើយ។
ស្ថិតនៅក្រោមរដ្ឋាភិបាលដឹកនាំដោយអតីតប្រធានាធិបតី Benigno Aquino ទំនាក់ទំនងហ្វីលីពីន និងចិន បានជាប់គាំងជុំវិញជម្លោះដែនទឹកនៅសមុទ្រចិនខាងត្បូង ប៉ុន្តែ ចាប់តាំងពីលោក ឌូទើតេ ឡើងកាន់អំណាចកាលពីចុងខែមិថុនាកន្លងមក គោលនយោបាយការបរទេសហ្វីលីពីន បានផ្លាស់ប្ដូរ៕
