សភាបក្សកាន់អំណាច បានប្រកាសប្រមូលសម្ភារៈរបស់រដ្ឋពីក្រុមតំណាងរាស្ត្របក្សប្រឆាំង បន្ទាប់ពីបក្សនេះ ត្រូវបានសម្រេចរំលាយចោលកាលពីសប្ដាហ៍មុន។
គណបក្សសង្គ្រោះជាតិ ដែលជាសំឡេងជំទាស់ធំបំផុតនៅក្នុងប្រទេសកម្ពុជា ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ទៅតាមបណ្ដឹងរបស់ក្រសួងមហាផ្ទៃ ហើយថ្នាក់ដឹកនាំ និងសមាជិកសរុប ១១៨រូបរបស់បក្សនេះ ក៏ត្រូវបានហាមឃាត់ការធ្វើនយោបាយរយៈពេល ៥ឆ្នាំទៀតផង។
ក្នុងសេចក្ដីជូនដំណឹងកាលពីថ្ងៃម្សិលមិញនេះ អ្នកនាំពាក្យរដ្ឋសភា ដែលមានតែក្រុមតំណាងរាស្ត្រគណបក្សប្រជាជនកម្ពុជានោះ បានប្រាប់ទៅក្រុមតំណាងរាស្ត្រគណបក្សសង្គ្រោះជាតិ ឲ្យប្រគល់សម្ភារៈទៅអគ្គលេខាធិការដ្ឋានរដ្ឋសភាវិញ នៅត្រឹមថ្ងៃទី២៤ ខែវិច្ឆិកានេះ។
ទោះជាយ៉ាងណា បន្ទាប់ពីគណបក្សប្រឆាំងដ៏ធំនៅកម្ពុជា ត្រូវបានរំលាយកាលពីសប្ដាហ៍មុន សហគមន៍អន្តរជាតិ មានទាំងអាមេរិក ចក្រភពអង់គ្លេស និងសហភាពអឺរ៉ុប បានថ្កោលទោសចំពោះរដ្ឋាភិបាលកម្ពុជា និងបានលើកឡើងថា កម្ពុជាបានដើរឃ្លាតពីគន្លងលទ្ធិប្រជាធិបតេយ្យ។
សហគមន៍អន្តរជាតិ ក៏បានព្រមានដាក់ទណ្ឌកម្មសេដ្ឋកិច្ចលើប្រទេសកម្ពុជាផងដែរ បន្ទាប់ពីបក្សប្រឆាំងត្រូវបានរំលាយ ហើយមេដឹកនាំបក្សនេះ នៅតែបន្តស្ថិតនៅក្រោមការឃុំខ្លួននៅឡើយនោះ។
ប៉ុន្តែ ប្រទេសចិនកុម្មុយនីស្តបានគាំទ្រចំណាត់ការរបស់កម្ពុជា ដោយថា ជាការរក្សាសន្តិភាព និងស្ថេរភាពជាតិ៕
