នៅថ្ងៃនេះ ក្រុមភេរវកម្មរដ្ឋអ៊ីស្លាម បានប្រកាសទទួលខុសត្រូវចំពោះការបើករថយន្តបំបុកមនុស្សនៅផ្សារគ្រីស្មាស់ ក្នុងទីក្រុងប៊ែរឡាំង ដែលបានសម្លាប់មនុស្ស ១២នាក់ ខណៈប៉ូលិសអាល្លឺម៉ង់កំពុងតាមស្វែងរកជនវាយប្រហារ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ទីភ្នាក់ងារព័ត៌មាន Amaq ដែលមានទំនាក់ទំនងនឹងក្រុមរដ្ឋអ៊ីស្លាម បានផ្សាយថា ទាហានម្នាក់របស់ក្រុមខ្លួន បានអនុវត្តប្រតិបត្តិការនៅទីក្រុងប៊ែរឡាំង ជាផ្នែកមួយនៃការវាយប្រហារទៅលើពលរដ្ឋនៃប្រទេសសម្ព័ន្ធមិត្ត ប៉ុន្តែ Amaq មិនបានបង្ហាញអត្តសញ្ញាណជនដៃដល់នោះឡើយ។
ការប្រកាសទទួលខុសត្រូវនេះ បានកើតឡើងភ្លាមៗក្រោយពីក្រុមរដ្ឋអាជ្ញាអាល្លឺម៉ង់និយាយថា ពួកគេមិនមានភស្តុតាង ហើយបានដោះលែងជនស្វែងរកសិទ្ធិជ្រកកោកជនជាតិប៉ាគីស្ថានម្នាក់ ដែលជាជនសង្ស័យតែម្នាក់គត់នៅក្នុងករណីនេះ។
ជនជាតិប៉ាគីស្ថានរូបនោះ ត្រូវបានចាប់ខ្លួនកាលពីល្ងាចថ្ងៃម្សិលមិញ បន្ទាប់ពីគេរាយការណ៍ថា បានឃើញជនរូបនោះលោតចេញពីរថយន្តធុនធំ ហើយរត់ភៀសខ្លួនចេញពីកន្លែងកើតហេតុ។ ប៉ុន្តែ ក្រុមមន្ត្រីបានបង្ហាញមន្ទិលសង្ស័យកាន់តែខ្លាំងថា តើពួកគេពិតជាបានចាប់ខ្លួនជនសង្ស័យពិតប្រាកដបានមែន ឬយ៉ាងណា៕
