អតីតមេដឹកនាំទីក្រុងហុងកុង លោក Donald Tsang ត្រូវបានតុលាការសម្រេចឲ្យជាប់ពន្ធនាគារ ២០ខែ បន្ទាប់ពីតុលាការរកឃើញថា លោកប្រព្រឹត្តល្មើសពាក់ព័ន្ធនឹងអំពើពុករលួយ អំឡុងពេលលោកដឹកនាំទីក្រុងមួយនេះ។ នេះដោយយោងតាមការចុះផ្សាយរបស់សារព័ត៌មាន Channel News Asia។
លោក Tsang អាយុ ៧២ឆ្នាំ បានកាន់តំណែងជាមេដឹកនាំទីក្រុងហុងកុងអស់រយៈពេល ៧ឆ្នាំ ចាប់ពីឆ្នាំ២០០៥ ហើយលោកគឺជាមន្ត្រីខ្ពស់បំផុតនៅទីក្រុងមួយនេះ ដែលត្រូវបានគេនាំយកទៅកាន់ទោស។
ការកាត់ទោសនេះ បាននាំឲ្យអាជីពរបស់លោក Tsang បានឈានដល់ទីបញ្ចប់ នៅក្នុងមជ្ឈមណ្ឌលហិរញ្ញវត្ថុអាស៊ីមួយនេះមុន និងក្រោយការប្រគល់ដែនដីហុងកុងទៅឲ្យប្រទេសចិនវិញ ហើយវាក៏បញ្ជាក់ឲ្យឃើញច្បាស់ថា ការប្រកាន់ច្បាប់ដ៏តឹងរឹងនៅទីក្រុងហុងកុង បានកាត់ទោសសូម្បីតែមេដឹកនាំមានអំណាចបំផុតនៅក្នុងទីក្រុងនេះ។
លោក Tsang ត្រូវបានគេនាំពីមន្ទីរពេទ្យចូលទៅតុលាការទាំងដៃជាប់ខ្នោះ បន្ទាប់ពីលោកមានបញ្ហាផ្លូវដង្ហើម និងឈឺដើមទ្រូង៕
