លោកនាយករដ្ឋមន្ត្រី ហ៊ុន សែន បានថ្លែងឌឺដងទៅលោក សម រង្សុី ថាកុំប្រកាសត្រៀមបង្ក្រាបបក្សប្រជាជនឲ្យសោះ ប្រសិនជាលទ្ធផលបោះឆ្នោតមិនទាន់ចេញជាផ្លូវការ ដោយលោកបង្ហើរថាកម្លាំងប្រដាប់អាវុធ គឺស្ថិតនៅលើដៃរបស់លោកទេ។
អតីតប្រធានបក្សសង្គ្រោះជាតិ លោក សម រង្ស៊ី ធា្លប់បានលើកឡើងកាលពីចុងឆ្នាំ២០១៦កន្លងទៅថា រដ្ឋាភិបាលថ្មីរបស់លោក នឹងត្រៀមបង្ក្រាបទៅលើគណបក្សកាន់អំណាច បើមិនទទួលស្គាល់លទ្ធផលឆ្នោតនិងមិនគោរពតាមរដ្ឋាភិបាលថ្មីរបស់លោក។
ថ្លែងក្នុ្ងងពិធីចែកសញ្ញាបត្រនៅព្រឹកនេះលោក ហ៊ុន សែន បានថ្លែងបែបឌឺដងទៅកាន់អតីតប្រធានគណបក្សប្រឆាំងរូបនេះថា កុំមានបំណងបែបនេះឲ្យសោះ ប្រសិនជាលទ្ធផលនៃការបោះឆ្នោតមិនទាន់ចេញជាផ្លូវការព្រោះអំណាចទ័ពស្ថិតនៅដៃរបស់លោកនៅឡើយ។
លោកថា៖ «មានអ្នកខ្លះហ៊ានទាំងអះអាងថា ដល់ឆ្នាំ២០១៨នឹងត្រូវបង្ក្រាបយើង ព្រោះយើងអត់ទទួលស្គាល់លទ្ធផលបោះឆ្នោត វាអាចទាយដឹងថានៅឆ្នាំ២០១៨ វានឹងឈ្នះ ហើយដល់ឆ្នាំ២០១៨ វានឹងបង្ក្រាប។ ហ៊ឹស! ទ័ពនៅដៃអញសោះហា! វាទៅរួច ចាំបោះឆ្នោតហើយ ចាំក្រុមប្រឹក្សាធម្មនុញ្ញប្រកាសរួចហើយ គណៈកម្មាធិការជាតិរៀបចំការបោះឆ្នោតប្រកាសផ្លូវការបានទេ ម៉េចក៏ចាំបាច់ប្រកាសផ្លូវការពីឥឡូវ ប្រកាសពីឥឡូវដែលមិនទាន់បានបោះឆ្នោតផង រួចឈ្នះៗ ដូរៗ បានតើដូរពីនៅក្រៅគុកទៅនៅក្នុងគុកទៅ»។
អ្នកនាំពាក្យគណបក្សសង្គ្រោះជាតិលោក យឹម សុវណ្ណ បដិសេធក្នុងការឆ្លើយតបទៅនឹងការលើកឡើងនេះ ដោយបង្វែរសំណួរទៅកាន់លោក សម រង្ស៊ី ដោយផ្ទាល់វិញព្រោះបច្ចុប្បន្នលោក សម រង្ស៊ី បានលាលែងពីប្រធានបក្សសង្គ្រោះជាតិហើយ។ ប៉ុន្តែវីអូឌីមិនទាន់អាចទាក់ទងលោក សម រង្ស៊ី បាននៅឡើយទេ។
សាស្ត្រាចារ្យវិទ្យាសាស្ត្រនយោបាយលោក ឯម សុវណ្ណារ៉ា យល់ថាការលើកឡើងនេះអាចចាត់ទុកជាការគំរាមមួយទៅកាន់គូបដិបក្ខខ្លួន ដើម្បីរក្សានូវទំនុកចិត្តពីអ្នកគាំទ្រ។ លោកថា៖ «គាត់ចង់បញ្ជាក់ឃើញថាទោះបីជាយន្តការឬការរៀបចំការបោះឆ្នោត នៅពេលខាងមុខឬនៅឆ្នាំក្រោយនេះ គណបក្សសង្គ្រោះជាតិមិនសង្ឃឹមថាអាចដណ្តើមប្រជាប្រិយភាពពីគណបក្សកាន់អំណាចបានទេ ហើយយន្តការឬក៏ការកាន់អំណាច កងកម្លាំងប្រដាប់អាវុធស្ថិតក្រោមការគ្រប់គ្រងរបស់រដ្ឋាភិបាលទាំងអស់ ដូច្នេះមិនអាចមកឌឺដងឬមកចង់បង្ក្រាបគាត់បានទេមានតែខាងគណបក្សកាន់អំណាចទេអាចបង្ក្រាបបាន នេះគាត់ចង់បញ្ជាក់ផ្ទុយទៅវិញ ក្នុងន័យនេះគាត់ចង់ឲ្យស្មារតីអ្នកគាំទ្រគណបក្សហ្នឹងឲ្យគិត កុំឲ្យស្រមើស្រមៃគិតអីក្រៅពីគណបក្សក្រៅរដ្ឋាភិបាល»។
ទោះជាយ៉ាងណាសម្រាប់ការបោះឆ្នោតឆ្នាំ២០១៨ខាងមុខ លោក ឯម សុវណ្ណារ៉ា យល់ថានឹងមិនមានការប៉ះបោរ ឬក៏សង្គ្រាមអាចកើតមាននោះទេដោយលោកលើកឡើងថាកម្លាំងប្រដាប់អាវុធទាំងអស់គឺស្ថិតនៅក្រោមការគ្រប់គ្រងរបស់បក្សកាន់អំណាច តែសេរីភាពនៃការបញ្ចេញមតិនៅពេលនោះអាចនឹងត្រូវរឹតត្បិតកាន់តែខ្លាំងជាងពេលនេះ ។
នៅព្រឹកនេះដែរលោកក៏បានរំលឹកឡើងវិញដោយថ្លែងបែបមិនចំឈ្មោះតែហាក់ដូចជាសំដៅទៅលើអ្នកវិភាគដែលកំពុងជាប់បណ្តឹងរបស់គណបក្សប្រជាជន និងត្រូវបានឃុំខ្លួននៅពន្ធនាគារព្រៃស លោក គឹម សុខ ថាសេរីភាពនៃការបញ្ចេញមតិនោះ បានប៉ះពាល់ដល់បក្សប្រជាជន ដូច្នេះហើយទើបមានបណ្តឹងនោះ។
លោកថា៖ «ខ្ញុំចូលចិត្តណាស់អ្នកវិភាគ ចង់អង្គុយ៥ម៉ោងវិភាគក៏បានដែរ តែអាមិនមែនមកវិភាគមកចោទថាអានេះសម្លាប់អានេះ អានេះសម្លាប់អានោះ អញ្ចឹងមានតែព្រៃសទេ អាហ្នឹងកុំឆ្ងល់ពេក! យាយខ្លីមកមើលទៅ!»។
ខណៈការបោះឆ្នោតកាន់តែខិតជិតចូលមកដល់កម្តៅនយោបាយនៅកម្ពុជាត្រូវបានគេមើលឃើញហាក់ដូចជាមានកំដៅកាន់តែខ្លាំងបន្ទាប់ពីមានការរំលាយប្រធានក្រុមមតិភាគតិច និងភាគច្រើននៅក្នុងសភា ការចាប់ខ្លួនអ្នកវិភាគ ការមិនចូលរួមប្រជុំសភាដោយបក្សប្រឆាំង ហើយចុងក្រោយនេះការអនុម័តច្បាប់ស្តីពីបក្សនយោបាយដែលចម្រូងចម្រាស បានធ្វើឲ្យមតិជាតិ និងអន្តរជាតិមួយចំនួនយល់ថា កម្ពុជាកំពុងដើរខុសពីគន្លងប្រជាធិបតេយ្យ ហើយបក្សប្រជាជនកំពុងតែត្រៀមដឹកនាំប្រទេសតែម្នាក់ឯងនាថ្ងៃអនាគត៕
