ស្ថានទូតកូរ៉េខាងជើងប្រចាំប្រទេសម៉ាឡេស៊ី បាននិយាយនៅថ្ងៃនេះថា ជនសង្ស័យ ៣នាក់ ដែលត្រូវបានសមត្ថកិច្ចម៉ាឡេស៊ីចាប់ខ្លួនពាក់ព័ន្ធនឹងឃាតកម្មលើលោក គីម ជុងណាម នោះ គួរត្រូវបានដោះលែងជាបន្ទាន់។ នេះដោយយោងតាមការចុះផ្សាយរបស់ទីភ្នាក់ងារព័ត៌មា Reuters។
ស្ថានទូតកូរ៉េខាងជើង បាននិយាយនៅក្នុងសេចក្ដីថ្លែងការណ៍មួយថា ស្ត្រីកាន់លិខិតឆ្លងដែនវៀតណាមម្នាក់ ស្ត្រីជនជាតិឥណ្ឌូនេស៊ីម្នាក់ និងបុរសជនជាតិកូរ៉េខាងជើងម្នាក់ ត្រូវបានសមត្ថកិច្ចម៉ាឡេស៊ីចាប់ខ្លួនដោយគ្មានហេតុផល។
លោក គីម ជុងណាម ដែលជាបងប្រុសម្ដាយទីទៃជាមួយមេដឹកនាំកូរ៉េខាងជើង លោក គីម ជុងអ៊ុន នោះ ត្រូវបានគេធ្វើឃាតនៅឯព្រលានយន្តហោះអន្តរជាតិទីក្រុងគួឡាឡំពួរ កាលពីសប្ដាហ៍មុន អំឡុងពេលលោកត្រៀមខ្លួនឡើងយន្តហោះហោះហើរទៅកាន់ទីក្រុងម៉ាកាវ។
ប៉ូលិសម៉ាឡេស៊ីនិយាយថា មន្ត្រីជាន់ខ្ពស់ម្នាក់នៅស្ថានទូតកូរ៉េខាងជើង និងបុគ្គលិកម្នាក់នៅក្រុមហ៊ុនអាកាសចរណ៍រដ្ឋរបស់ម៉ាឡេស៊ី ក៏ស្ថិតនៅក្នុងចំណោមជនដែលសមត្ថកិច្ចតាមរកចាប់ខ្លួនយកទៅសួរចម្លើយជុំវិញឃាតកម្មនេះផងដែរ៕
