រដ្ឋមន្ត្រីការបរទេសអាមេរិក លោក Rex Tillerson និងសមាជិកក្រុមប្រឹក្សារដ្ឋចិន លោក យ៉ាង ជីឈី បានបញ្ជាក់ពីសារសំខាន់នៃទំនាក់ទំនងទ្វេភាគីរវាងប្រទេសទាំងពីរអំឡុងកិច្ចសន្ទនាតាមទូរស័ព្ទមួយ។ នេះដោយយោងតាមការចុះផ្សាយរបស់សារព័ត៌មាន Channel News Asia ដែលបានដកស្រង់សេចក្ដីថ្លែងការណ៍របស់ក្រសួងការបរទេសអាមេរិក នៅថ្ងៃនេះ។
អ្នកនាំពាក្យក្រសួងការបរទេសអាមេរិក លោក Mark Toner បាននិយាយក្នុងសេចក្ដីប្រកាសព័ត៌មាននោះថា ភាគីទាំងពីរ បានឯកភាពគ្នាទៅលើតម្រូវការចាំបាច់ក្នុងការដោះស្រាយការគំរាមកំហែងទៅលើស្ថេរភាពតំបន់ ដែលបង្កឡើងដោយប្រទេសកូរ៉េខាងជើង។
អ្នកនាំពាក្យរូបនេះ បានបន្ថែមថា មន្ត្រីជាន់ខ្ពស់ទាំងពីររូបរបស់ប្រទេសទាំងពីរនេះ ក៏បានពិភាក្សាផងដែរអំពីទំនាក់ទំនងសេដ្ឋកិច្ច និងពាណិជ្ជកម្ម និងកិច្ចសហប្រតិបត្តិការផ្នែកប្រយុទ្ធប្រឆាំងនឹងអំពើភេរវកម្ម ការអនុវត្តច្បាប់ និងបទល្មើសឆ្លងដែនរវាងប្រទេសទាំងពីរ៕