ស្ថាបនិកក្រុមហ៊ុនហ្វេសប៊ុកលោកម៉ាក ហ្សូហ្គឺប៊ឺក(Mark Zuckerberg) បានសារភាពថា ទិន្ន ន័យឯកជនរបស់អ្នកប្រើប្រាស់បណ្តាញទំនាក់ទំនងសង្គមនេះ ត្រូវបានគេលួចយកទៅប្រាស់ក្នុងហេតុផលនយោបាយ។
ក្រុមហ៊ុនប្រឹក្សាយោបល់របស់អង់គ្លេសមួយឈ្មោះCambridge Analytica រងការចោទប្រកាន់ថា បានលួចយកទិន្នន័យអ្នកប្រើប្រាស់ហ្វេសប៊ុកដើម្បីប្រឹក្សាយោបល់ ឬវិភាគយុទ្ធសាស្ត្រឲ្យអ្នកនយោបាយគាំទ្រលោក ដូណាល ត្រាំ ដែលប្រកួតប្រជែងការបោះឆ្នោតកាលពីឆ្នាំ២០១៦។ ក្រុមហ៊ុននេះលួចទិន្នន័យពីអ្នកប្រើប្រាស់ជាង៥០លានឈ្មោះ។
នៅក្នុងសេចក្តីថ្លែងការណ៍លើកដំបូងរបស់លោក ម៉ាក ហ្សូហ្គឺប៊ឺក ដែលសរសេរនៅលើហ្វេសប៊ុករបស់លោកនៅថ្ងៃនេះ លោកបានលើកឡើងថា កំហុសនេះកំពុងតែធ្វើឲ្យអ្នកប្រើប្រាស់បាត់បង់ទំនុកចិត្ត។
ចំណែកនៅក្នុងបទសម្ភាសន៍ជាមួយសារព័ត៌មានCNNស្ថាបនិកបណ្តាញសង្គមហ្វេសប៊ុកនេះ ថ្លែងថា លោកពិតជាត្រូវសុំទោសដល់អ្នកប្រើប្រាស់ ហើយថា នឹងចាត់វិធានការដោះស្រាយកំហុសដែលបានកើតឡើងទាំងនេះ។ លោកថា លោកសប្បាយចិត្តចំពោះការទទួលព័ត៌មាននេះ ហើយថា នឹងរៀបចំផែនការដើម្បីកែលម្អឲ្យបានត្រឹមត្រូវវិញ។
ទោះយ៉ាងណាគេមិនបានឃើញការបញ្ជាក់ណាមួយរបស់ក្រុមហ៊ុនហ្វេសប៊ុកថា នឹងរៀបចំប្តឹងក្រុមហ៊ុនដែលលួចយកទិន្នន័យឯកជនរបស់អ្នកប្រើប្រាស់នោះទេ។ ចំណែកការលួចយកទិន្នន័យអ្នកប្រើប្រាស់ហ្វេសប៊ុកនេះ មិនមែនជាលើកទី១នោះទេ បើទោះជាក្រុមហ៊ុនតែងតែសន្យាថា នឹងការពារសុវត្ថិភាពទិន្នន័យឯកជនរបស់អ្នកប្រើប្រាស់ក៏ដោយ។
ក្រុមហ៊ុនហ្វេសប៊ុកក៏ធ្លាប់ផ្ទុះរឿងអាស្រូវចំពោះការលួចយកទិន្នន័យឯកជនអ្នកប្រើប្រាស់កាលពីឆ្នាំ២០១៣ ២០១៤ និង ២០១៥ដែរ។
