ទីបំផុតទៅ រដ្ឋាភិបាលឥណ្ឌាសម្រេចអនុម័តច្បាប់ដាក់ទោសប្រហារជីវិតជនរំលោភសេពសន្ថវៈលើកុមារី ដែលការសម្រេចនេះកើតឡើងក្រោយពីកុមារីវ័យ ៨ឆ្នាំម្នាក់ ត្រូវបានក្រុមអន្ធពាលរំលោភ ហើយសម្លាប់។
ទីភ្នាក់ងារព័ត៌មាន AFP បានចុះផ្សាយថា នាយករដ្ឋមន្ត្រីឥណ្ឌា លោក នរេន្ទ្រ ម៉ូឌី បានកោះប្រជុំគណៈរដ្ឋមន្ត្រីរបស់លោកដើម្បីអនុម័តវិធានការថ្មីនេះកាលពីថ្ងៃម្សិលមិញ ក្រោយពីលោកវិលត្រឡប់ពីកិច្ចប្រជុំកំពូលក្រុមប្រទេស Commonwealth។
ការសម្រេចបែបនេះរបស់រដ្ឋាភិបាលឥណ្ឌា បានកើតឡើងដូចទៅនឹងការចង់បានរបស់ក្រុមមហាជន ដែលទាមទារឲ្យដាក់ទោសប្រហារជីវិតជនរំលោភសេពសន្ថវៈកុមារី និងស្ត្រី បន្ទាប់ពីករណីរំលោភសម្លាប់ដ៏តក់ស្លុកនានា បានកើតឡើងនាពេលកន្លងមក និងបង្កកំហឹងក្នុងចំណោមមហាជនទូទាំងប្រទេស។
បើតាមសេចក្ដីរាយការណ៍របស់ AFP បាតុកម្មនានាបានផ្ទុះឡើងនៅទូទាំងប្រទេសឥណ្ឌាប៉ុន្មានថ្ងៃថ្មីៗនេះ បន្ទាប់ពីករណីរំលោភសម្លាប់លើកុមារីមូស្លីមម្នាក់ពីសំណាក់ក្រុមបុរសកាន់សាសនាហិណ្ឌូនៅតំបន់ចាម្មូ និងរដ្ឋកាស្មៀរ ដែលបង្ខំឲ្យលោក ម៉ូឌី ត្រូវតែចាត់វិធានការបែបនេះ។
ឥណ្ឌាមានប្រវត្តិអាក្រក់ខាងរំលោភបូក ហើយសម្លាប់ ដែលបានកើនឡើងជារឿយៗ។ ករណីរំលោភបូក ហើយសម្លាប់ដ៏កក្រើកមួយ បានកើតឡើងទៅលើនិស្សិតស្រីម្នាក់នៅទីក្រុងដេលី។ និស្សិតស្ត្រីរូបនោះ ត្រូវក្រុមបុរសអន្ធពាលរំលោភបូកនៅលើរថយន្តក្រុងមួយគ្រឿងកាលពីឆ្នាំ២០១២។ ករណីនេះត្រូវបានចុះផ្សាយព្រោងព្រាតនៅទូទាំងពិភពលោក៕