មន្ត្រីព្រះបរមរាជវាំង បានច្រានចោលនូវព័ត៌មានដែលថា ព្រះមហាក្សត្រ នរោត្តម សីហមុនី ព្រះអង្គមានហ្វេសប៊ុកផ្ទាល់ព្រះអង្គ សម្រាប់បញ្ចេញទស្សនៈ ពីបញ្ហាសង្គម ដូចដែលបណ្តាញសង្គម កំពុងចែករំលែកព័ត៌មានតៗនោះទេ។
នៅប៉ុន្មានថ្ងៃនេះ បណ្តាញសង្គមបានបង្ហោះតៗគ្នាពីផេក(Page)មូយដែលដាក់រូបភាពព្រះមហាក្សត្រ ព្រះបាទនរោត្តម សីហមុនី ដែលហ្វេសប៊ុកនោះ បានរិះគន់រដ្ឋាភិបាលថា រិតត្បិតសេរីភាពបញ្ចេញមតិរបស់ប្រជារាស្ត្រ។
នៅក្នុងផេក(page) ដែលមានឈ្មោះថា ” ព្រះមហាក្សត្រនៃព្រះរាជាណាចក្រកម្ពុជា” ដែលគេបានបង្ហោះតៗគ្នានោះមានខ្លឹមសារថា “បើសិនជាថ្ងៃណាមួយសេរីភាពក្នុងការបញ្ចេញមតិរបស់ប្រជារាស្ត្រ ត្រូវបានគេបិទសិទ្ធិរហូតដល់ក្លាយជាមនុស្ស “គ” អស់ទៅហើយនោះប្រជារាស្ត្រក៏មិនខុសគ្នាអំពីសត្វចៀម ឬពពែដែលត្រូវបានគេយកទៅចូលកន្លែងសត្តឃាដនោះឡើយ”។
មន្ត្រីព្រះបរមរាជវាំងនិងជាទីប្រឹក្សាព្រះរាជលេខាធិការដ្ឋានរបស់សម្តេចព្រះមហាក្សត្រី មុនីនាថ សីហនុ លោក អ៊ុំ ដារ៉ាវុធ ប្រាប់វីអូឌី(VOD)នៅថ្ងៃទី២២ខែឧសភា នេះថា ព្រះមហាក្សត្រមិនមានហ្វេសប៊ុកផ្ទាល់ព្រះអង្គទេ។ លោកថា ករណីព្រះបរមរាជវាំង នឹងធ្វើសេចក្តីប្រកាសព័ត៌មានច្រានចោលជាសាធារណនៅពេលឆាប់ៗនេះ។
នៅពេលសួរថា តើព្រះបរមរាជវាំងនឹងមានវិធានការយ៉ាងណា ទៅលើអ្នកដែលបង្កើត (page) ក្លែងបន្លំនេះ?លោកថា ព្រះមហាក្សត្រអព្យាក្រិត ទំនងជាទុកឲ្យរដ្ឋាភិបាល ជាអ្នកដោះស្រាយជំនួស។
លោក អ៊ុំ ដារ៉ាវុធ ឲ្យដឹងទៀតថា ប្រភពដដែលបញ្ជាក់ថា អ្នកបង្កើត (page) នេះ មាននៅប្រទេសបារាំង និងអាមេរិក ប៉ុន្តែលោកថា មិនទាន់ដឹងថាបុគ្គល ណាមួយពិតប្រាកដនៅឡើងទេ។
ការបង្ហោះពីព័ត៌មានដ៏កម្រថា ព្រះមហាក្រត្រមានហ្វេសប៊ុក ហើយបានរិះគន់ពីការរំលោភសិទ្ធិមនុស្សនៅកម្ពុជានេះ ធ្វើងឡើងចំពេលដែល ស្ថានការនយោបាយនៅកម្ពុជា ឈានទៅចាប់ខ្លួនសកម្មជនបក្សប្រឆាំង ចាប់តំណាងរាស្ត្រទាំងមានអភ័យឯកសិទ្ធិ និងចាប់មន្ត្រីការពារសិទ្ធិមនុស្សមួយចំនួនដាក់ពន្ធនាគារ ព្រមទាំងសេរីភាពបញ្ចេញមតិ ត្រូវគេមើលឃើញថា បានរឹតបន្តឹង។
