មេដឹកនាំបក្សប្រឆាំង លោក កឹម សុខា ហាក់បានផ្ញើសារនយោបាយដោយប្រយោល រំឭកដៃគូប្រកួតឲ្យចាប់យកវប្បធម៌អហិង្សា ដើម្បីដោះស្រាយបញ្ហាជាតិ ដោយថាគ្រប់បញ្ហាសង្គម មិនមែនដោះស្រាយដោយ «ការគំរាមកំហែងនោះទេ»។
កាលពីថ្ងៃពុធម្សិលមិញ លោកនាយករដ្ឋមន្ត្រី ហ៊ុន សែន បានព្រមានជាថ្មីទៀត ពីលទ្ធភាពអាចផ្ទុះសង្គ្រាម ដោយថា បើទោះបីភាគីម្ខាងទៀត គ្មានអាវុធក៏ដោយ។ ការគំរាមម្តងហើយម្តងទៀតរបស់លោក ហ៊ុន សែន នេះ ខណៈកម្ពុជាគ្រោងនឹងរៀបចំការបោះឆ្នោតជាតិនៅឆ្នាំ២០១៨ខាងមុខ។
ប្រធានគណបក្សសង្គ្រោះជាតិ លោក កឹម សុខា សរសេរលើហ្វេសប៊ុកផ្លូវការ របស់លោកនាថ្ងៃទី២២ខែមិថុនានេះថា មានតែរៀបចំការបោះឆ្នោតដោយ សេរី ត្រឹមត្រូវ និងយុត្ដិធម៌ទេ ដែលលោកថា ជាដំណោះស្រាយបញ្ហា របស់ប្រទេសជាតិបានយ៉ាងល្អ នាំមកនូវភាពវិជ្ជមាន សម្រាប់សង្គមជាតិ។
លោក កឹម សុខា បញ្ជាក់ថា «ការបោះឆ្នោត គឺជាការផ្ដល់ឱកាសដល់ប្រជាពលរដ្ឋ ជាអ្នកសម្រេចថា អ្នកដឹកនាំណា មានគុណសម្បត្ដិ ឬ មានគុណវិបត្ដិ និងគោលនយោបាយ របស់គណបក្សណា ល្អ ឬ មិនល្អ។ គ្រប់បញ្ហាសង្គម មិនមែនដោះស្រាយដោយ ការគំរាមកំហែង បំភិតបំភ័យនោះទេ»។
យ៉ាងណាក៏ដោយ លោក កឹម សុខា បានលើកទឹកចិត្តឲ្យប្រជាពលរដ្ឋបន្ដ និងពង្រីកការចូលរួមសកម្មភាពនយោបាយ និងចូលរួមការបោះឆ្នោតជ្រើសរើសអ្នកដឹកនាំ ដោយលោកថា ការសម្រេចចិត្តបោះឆ្នោតជ្រើសរើសមេដឹកនាំ បានផ្សាភ្ជាប់ទៅនឹងការកំនត់ជោគវាសនាអនាគត របស់កូនចៅ និងប្រទេសជាតិ៕
