របាយការណ៍ថ្មីមួយបានបង្ហាញថា ចំនួនអ្នកដាក់ប្រាក់បញ្ញើក្នុងឧស្សាហកម្មធនាគារ និងហិរញ្ញវត្ថុកម្ពុជា បានកើនឡើង ១១ភាគរយ នៅឆមាសទី១កន្លងមកនេះ ខណៈដែលចំនួនអ្នកប្រើប្រាស់កម្ចីហិរញ្ញវត្ថុ បានធ្លាក់ចុះទៅវិញ។
របាយការណ៍មួយដែលចេញដោយធនាគារជាតិកម្ពុជានៅព្រឹកថ្ងៃនេះ បានបង្ហាញថា ចំនួនអ្នកដាក់ប្រាក់បញ្ញើនៅក្នុងគ្រឹះស្ថានធនាគារ និងហិរញ្ញវត្ថុនៅកម្ពុជា បានកើនឡើងដល់ចំនួន ៤.៨លាននាក់ហើយ គិតត្រឹមឆមាសទី១ក្នុងឆ្នាំ២០១៧នេះ ដោយបានកើនឡើង ១១ភាគរយ បើធៀបនឹងឆមាសទី១ឆ្នាំ២០១៦កន្លងមក។
របាយការណ៍ដែលនេះ បង្ហាញទៀតថា ប៉ុន្តែ ចំនួនអ្នកប្រើប្រាស់កម្ចីហិរញ្ញវត្ថុនៅក្នុងឧស្សាហកម្មនេះ បានថយចុះមកនៅត្រឹមចំនួន ២.៦លាននាក់ ដោយបានបាត់បង់អស់ ០.១៦ភាគរយ បើធៀបទៅនឹងរយៈពេលដូចគ្នាឆ្នាំកន្លងមក។
របាយការណ៍នេះ ក៏បានបង្ហាញឲ្យដឹងទៀតថា ម៉ាស៊ីនដក និងដាក់ប្រាក់ស្វ័យប្រវត្តិ មានចំនួន ១៧២២ នៅទូទាំងប្រទេស ដោយបានកើនឡើង ១៧.៦ភាគរយ បើធៀបទៅនឹងឆ្នាំមុន៕