ពលរដ្ឋខែ្មរដែលកំពុងរស់នៅតាមបណ្តាប្រទេសមួយចំនួន បានរៀបចំការប្រមូលផ្តុំតវ៉ាក្នុងពេលបន្តបន្ទាប់គ្នា នៅតាមប្រទេសដែលពួកគេរស់នៅ ដើម្បីទាមទារឲ្យរដ្ឋាភិបាលកម្ពុជាដោះលែងលោក កឹម សុខា និង អនុវត្តន៍ការដឹកនាំតាមបែបប្រជាធិបតេយ្យ។
តាមសេចក្តីប្រកាសព័ត៌មានរបស់សហគមន៍ខ្មែររស់នៅក្រៅប្រទេសបានឲ្យដឹងថា ពលរដ្ឋខ្មែរដែលរៀបចំតវ៉ានៅប៉ុន្មានថ្ងៃបន្តបន្ទាប់គ្នានេះមាននៅដូចជា សហរដ្ឋអាមេរិក កូរ៉េខាងត្បួង ជប៉ុន អូស្ត្រាលី អាល្លឺម៉ង់ និង បណ្តាលប្រទេសនៅសហភាពអឺរ៉ុប។
សេចក្តីប្រកាសព័ត៌មានរបស់ពលរដ្ឋខ្មែរនៅអាមេរិកបានឲ្យដឹងថា ខណៈដែលអង្គការសហប្រជាជាតិកំពុងបើកកិច្ចប្រជុំមហាសន្និបាតលើកទី ៧២ នៅទីក្រុង New York នាថ្ងៃសុក្រនេះ ពលរដ្ឋខ្មែររស់នៅទីនោះ បានប្រមូលផ្ដុំគ្នាតវ៉ា នៅខាងមុខស្នាក់ការរបស់អង្គការសហប្រជាជាតិដោយពួកគេថា ដើម្បីផ្ញើសារឲ្យមេដឹកនាំនៃបណ្ដាប្រទេសទាំងអស់លើពិភពលោកបានដឹងពីការរំលោភសិទ្ធិមនុស្ស និង ការដឹកនាំខុសគន្លងលទ្ធិប្រជាធិបតេយ្យនៅកម្ពុជា។
ក្នុងកិច្ចសម្ភាសមួយជាមួយវិទ្យុអាស៊ីសេរី កាលពីម្សិលមិញលោក យឹម ស៊ីណន ដែលជាអ្នកដឹកនាំធ្វើ បាតុកម្មនៅប្រទេសកូរ៉េខាងត្បូង ថ្លែងថា នៅថ្ងៃទី១ ខែតុលាខាងមុខនេះ ពលករ និងពលររដ្ឋខ្មែររស់នៅប្រទេសទីនោះប្រមាណ២ ពាន់នាក់ នឹងនាំគ្នាតវ៉ានៅមុខសាលាក្រុងសេអ៊ួល ដើម្បីស្នើឲ្យរដ្ឋាភិបាលមួយនេះ ដាក់សម្ពាធមករដ្ឋាភិបាលកម្ពុជាឲ្យដោះលែងលោក កឹម សុខា និងទាមទារមានការបោះឆ្នោតនៅក្រៅ ប្រទេសដូចប្រទេសផ្សេងៗដែរ។
លោកថា«ចំណុចសំខាន់ទី ១ ទាមទារឲ្យដោះលែង ទី២ ទាមទារឲ្យមានការបោះឆ្នោតនៅក្រៅប្រទេស ទី៣ ទាមទារឲ្យកែសម្រួលប្រព័ន្ធយុត្តិធម៌សង្គម ពីការបញ្ចេញមតិផ្ទាល់ខ្លួនរបស់ពលរដ្ឋ នីមួយៗ តាមរយៈហ្វេសប៊ុកក្ដី តាមរយៈវិទ្យុតាមរយៈទីសាធារណៈគឺឲ្យគាត់បើកឲ្យទូលាយ ដើម្បីស្របទៅនឹង ប្រទេសមួយដែលប្រកាន់ភ្ជាប់របបលទ្ធិប្រជាធិបតេយ្យ ព្រោះអីនៅពេលដែលបងប្អូនគាត់រិះគន់ ដើម្បីស្ថាបនាអី គាត់ត្រូវបានគេចោទប្រកាន់ ការចាប់ខ្លួនជាដើមវាទៅជាការរំលោភសិទ្ធិមួយ ពលរដ្ឋនៅប្រទេសគាត់ឈឺចាប់មិនអាចទទួលយកបានទេ»។
ពាក់ព័ន្ធនឹងការតវ៉ានេះដែរ សហគមន៍ខ្មែរនៅតំបន់អឺរ៉ុបបានឲ្យដឹងថា នៅថ្ងៃទី ២៦ ខែកញ្ញាខាងមុខនេះ ពលរដ្ឋខ្មែរមកពីរបណ្ដាប្រទេសនៅទីនោះ នឹងនាំគ្នាធ្វើបាតុកម្មនៅមុខការិយាល័យសិទ្ធិមនុស្សរបស់អង្គការសហប្រជាជាតិ នៅទីក្រុងហ្សឺណែវ ប្រទេសស្វ៊ីស ដើម្បីទាមទារឲ្យដោះលែងលោក កឹម សុខា។
ចំណែកពលរដ្ឋខ្មែរនៅក្នុងប្រទេសជប៉ុនឲ្យដឹងថា នៅថ្ងៃទី២៧ខែកញ្ញា ពួកគេ នឹងហែញ្ញត្តិយកទៅដាក់នៅការិយាល័យរដ្ឋាភិបាលជប៉ុន ដើម្បីសុំឲ្យប្រទេសមួយនេះជួយដោះស្រាយវិបត្តិនយោបាយនៅកម្ពុជា។
អ្នកនាំពាក្យគណបក្សកាន់អំណាច លោក សុខ ឥសាន មានប្រសាសន៍ថា ការតវ៉ារបស់ពលរដ្ឋខ្មែរនៅក្រៅប្រទេសនោះ មិនមានឥទ្ធិពលលើរដ្ឋាភិបាលកម្ពុជាជាប្រទេសឯករាជ្យបាននោះទេ។ លោកបន្តថា បើទោះបីជាពលរដ្ឋនៅក្រៅប្រទេសធ្វើបាតុកម្ម យ៉ាងណាក៏មិនមានដំណោះស្រាយដែរ គឺមានតែតុលាការទេជាអ្នកសម្រេចចំពោះរឿងនេះ។
លោកថា«ព្រោះកឹម សុខា ប្រព្រឹត្តិបទល្មើសទៅហើយ ចឹងដំណោះស្រាយមានតែទុក ឲ្យតុលាការដំណើរការតាមនីតិវិធី ទៅតាមគោលការណ៍ច្បាប់។ តុលាការ ចាប់នីតិវិធីស៊ើបអង្កេតគេបើកអង្គសវនាការយ៉ាងម៉េចចាំស្ដាប់លទ្ធផលនៃការកាត់ក្ដីរបស់តុលាការ នឹងហើយតាមនីតិវិធីនោះ មិនអាចទៅធ្វើបាតុកម្មដើម្បី ឲ្យដោះលែងជននេះ ជននោះ ចឹងបានអីយើងអនុវត្តនីតិរដ្ឋបាន បើយើងចេះនាំគ្នាបាតុកម្ម យកវប្បធម៌នីទណ្ឌ ភាពមកធ្វើ មក ចាប់បង្ខំឲ្យរដ្ឋាភិបាល ធ្វើហើយ យើងទាំងអស់គ្នាចង់បាន នីតិរដ្ឋហើយលទ្ធិប្រជាធិបតេយ្យ បើចង់បានលទ្ធិប្រជាធិបតេយ្យ ហើយផ្សារភ្ជាប់នីតិទេវាទៅជាអាណាធិបតេយ្យប្រទេសហ្នឹង។»
សហគមន៍អន្តរជាតិ រួមទាំងអាមេរិក អង់គ្លេស សហភាពអឺរ៉ុប និងបារាំង បានសម្តែងការព្រួយបារម្ភនិងថ្កោលទោសរដ្ឋាភិបាលកម្ពុជាបន្តបន្ទាប់ ក្រោយពេលចាប់ខ្លួនលោក កឹម សុខា ប្រធានគណបក្សប្រឆាំង និងការបិទប្រព័ន្ធផ្សព្វផ្សាយជាបន្តបន្ទាប់។ ប៉ុន្តែសម្រាប់រដ្ឋាភិបាលបានបកស្រាយថា វិធានការទាំងនេះ ជាវិធានការផ្លូវច្បាប់ ដើម្បីពង្រឹងការអនុវត្តច្បាប់នៅកម្ពុជា ហើយលោកនាយករដ្ឋមន្ត្រី ហ៊ុន សែន ក៏បានព្រមានប្រទេសនានាមិនឲ្យជ្រៀតជ្រែកលើកិច្ចការផ្ទៃក្នុងរបស់កម្ពុជា។