ក្រសួងបង្ហាញរបាយការណ៍ថា ភ្ញៀវទេសចរណ៍ជាង១លាននាក់បានដើរកំសាន្តតាមរមណីដ្ឋានទេសចរណ៍នានាក្នុងឱកាសបុណ្យភ្ជុំបិណ្ឌ ឆ្នាំនេះ បើប្រៀបធៀបគឺមានការកើនឡើងជាងឆ្នាំមុន។
របាយការណ៍ដែលក្រសួងទេសចរណ៍ផ្សព្វផ្សាយនៅថ្ងៃនេះ បានឲ្យដឹងថា ចំនួនភ្ញៀវ ទេសចរណ៍ជាតិ និងអន្តរជាតិប្រមាណជិត១លាន៥ម៉ឺននាក់ (១ ០៥០ ០០០នាក់) បានដើរកំសាន្តតាមរមណីដ្ឋានទេសចរណ៍នានាក្នុងប្រទេសកម្ពុជា បើប្រៀបធៀបនឹងឆ្នាំ២០១៦ គឺកើនឡើងប្រមាណ១៥,៧០%។ ក្នុងនោះភ្ញៀវជាតិ មានចំនួនជាង១លាននាក់(១ ០១០ ០០០នាក់) កើនឡើងប្រមាណ ១៥,៣០% និងភ្ញៀវទេសចរអន្តរជាតិប្រមាណ ៤០,០០០នាក់កើនឡើងប្រមាណ ៦,២០% ផងដែរ។
ខេត្តដែលមានភ្ញៀវទេសចរណ៍ដើរកំសាន្តច្រើនជាងគេ គឺមានខេត្ត សៀមរាប ខេត្តព្រះសីហនុ ខេត្តបាត់ដំបង និងខេត្តកំពត ។
ក្រសួងទេសចរណ៍បញ្ជាក់ថា មូលហេតុដែលបណ្តាលមានចំនួនអ្នកទេសចរកើនឡើងបែបនេះដោយសារតែរមណីយដ្ឋាន និងគោលដៅទេសចរណ៍ទាំងនោះ ត្រូវបានស្ថាបនាជួសជុល ឬកែលំអរ និងត្រូវបានទប់ស្កាត់មិនឲ្យមានការដំឡើងថ្លៃហួសហេតុលើម្ហូបអាហារ និងសេវាកម្មទេសចរណ៍ផ្សេងៗជាដើម។
លើសពីនេះទៀត ក្រសួងបានរៀបចំបញ្ហាបរិស្ថានអនាម័យល្អប្រសើរជាងមុន និងមានការការពារសន្តិសុខ សុវត្តិភាពដល់ភ្ញៀវបានល្អប្រសើរដែរ។
កាលពីខែ សីហា ឆ្នាំ២០១៧ អគ្គស្នងការនគរបាលជាតិបានដាក់បញ្ជាឲ្យមន្ត្រីថ្នាក់ក្រោមពង្រឹងការ ការពារសន្តិសុខសណ្តាប់ធ្នាប់សង្គមដល់រាជធានីខេត្តទេសចរណ៍សំខាន់ៗចំនួន៣ រួមទាំងរាជធានីភ្នំពេញផងដែរ ដោយថា ឲ្យពង្រឹងការ ការពារសន្តិសុខ ជូនប្រជាពលរដ្ឋ និងភ្ញៀវទេសចរ ជាពិសេសភ្ញៀវទេសចរអន្តរជាតិ៕