មន្ត្រីរដ្ឋាភិបាលចិនថ្លែងកាលពីថ្ងៃអាទិត្យម្សិលមិញថា គោលនយោបាយអនុញ្ញាតឲ្យប្តីប្រពន្ធ១គូមានកូនបាន២នាក់ គឺទទួលបានផលជោគជ័យល្អសម្រាប់ជាតិ ហើយសម្រាប់ឆ្នាំ២០១៦ អត្រាកើតថ្មីមានចំនួន១៧,៨៦លាននាក់។
លោក Yang Wenzhuang មន្ត្រីនៅ គណៈកម្មាធិការសុខភាពជាតិ និង ផែនការគ្រួសារ បានថ្លែងថា ចំនួននេះកើនឡើង១,៤លាននាក់ បើប្រៀបធៀបទៅ ចន្លោះឆ្នាំ២០១១ ដល់២០១៥។នេះ បើតាមទីភ្នាក់ងារសារព័ត៌មានរ៉យទ័រ។
លោក ថា ពេលដែលមានការសិក្សាថា កុមារអាយុក្រោម៥ឆ្នាំ មានការកើនឡើង បង្ហាញថា ផែនការ គ្រួសារមួយមានកូនពីរនាក់ទទួលបានជោគជ័យ។
ដំបូងឡើយចិន ដែលបច្ចុប្បន្នមានប្រជាពលរដ្ឋជាង ១ពាន់លាននាក់ មានការបារម្ភពីអត្រាកំណើតប្រជាជនច្រើនពេកទើបដាក់គោលនយោបាយ គ្រួសារមួយមានកូនម្នាក់១ កាលពីទសវត្សរ៍ឆ្នាំ ១៩៧០ ប៉ុន្តែក្រោយមក ពួកគេខ្វះកម្លាំងពលកម្ម ទើបមានការកែសម្រួល ឲ្យគ្រួសារមួយមានកូនពីរនាក់វិញ៕