នគរបាលវៀតណាមបានឃាត់ខ្លួនអ្នកដែលធ្វើសកម្មភាពតាមអ៊ិនធើណែត រិះគន់រដ្ឋាភិបាលកាលពីថ្ងៃសៅរ៍ តាមរយៈអ៊ិនធើណែត ដែលនេះត្រូវបានក្រុមការពារសិទ្ធិមនុស្សបញ្ជាក់ថា ជាផ្នែកមួយនៃការបង្ក្រាបលើអ្នករិះគន់របស់រដ្ឋាភិបាលកុម្មុនីស្តវៀតណាម។
អ្នកស្រី Tran Thi Nga អាយុ៣៩ឆ្នាំ ត្រូវបានឃាត់ខ្លួននៅខេត្តភាគខាងជើងរបស់វៀតណាម ដែលនគរបាលចោទថា គេហទំព័ររបស់គាត់ មានការផ្សព្វផ្សាយ យុទ្ធនាការតាមការសរសេរ និង វីឌីអូ បំផុសឲ្យសាធារណជនងើបឡើងប្រឆាំងរដ្ឋាភិបាល។នេះបើតាមការផ្សាយរបស់ Strait Times។
អ្នកសរសេរប្លក់ និង អ្នកមាននិន្នាការប្រឆាំងបង្ហាញជំហរគាំទ្រដល់អ្នកស្រី Tran Thi Nga ដែលត្រូវបានចាប់ខ្លួននោះ។
បើទោះបីជាគេមើលឃើញថា វៀតណាមមានការកែទម្រង់ ផ្នែកសេដ្ឋកិច្ច បើកទូលាយឲ្យមានការផ្លាស់ប្តូរក្នុងសង្គម រួមទាំងបើកសិទ្ធិសេរីភាពដល់អ្នកស្រលាញ់ភេទដូចគ្នា អ្នកកែភេទ ប៉ុន្តែរដ្ឋាភិបាលវៀតណាមនៅតែរឹតត្បិតសេរីភាពចំពោះអ្នករិះគន់។
អង្គការឃ្លាំមើលសិទ្ធិមនុស្សអន្តរជាតិ មានមូលដ្ឋាននៅទីក្រុងញូយ៉ក អាមេរិក បានបង្ហាញរបាយការណ៍កាលពីចុងឆ្នាំ២០១៥ថា អ្នកទោសនយោបាយជាង១៣០នាក់ កំពុងជាប់ពន្ធនាគារនៅវៀតណាម ដោយសារការរិះគន់រដ្ឋាភិបាល៕
