ជាថ្មីម្តងទៀត គណបក្សប្រជាជនកម្ពុជា បានណែនាំឲ្យប្រធានស្ថាប័នរដ្ឋនីមួយៗ ទទួលយកបេក្ខជនរបស់ខ្លួន ដែលគណបក្សនេះថា ពុំបានជាប់ឈ្មោះនៅក្នុងការបោះឆ្នោតឃុំ-សង្កាត់ ឆ្នាំ២០១៧នេះ។
នៅក្នុងលិខិតចុះថ្ងៃទី១៦កុម្ភៈ២០១៧ ដែលយោងតាមចំណារបស់លោក ហ៊ុន សែន ប្រធានគណបក្សប្រជាជនកម្ពុជា លោកស្រី ម៉ែន សំអន ក្នុងនាមជាសេនាធិការ បានប្រាប់ឲ្យ «ប្រធានស្ថាប័នរដ្ឋ នីមួយៗត្រូវទទួលយកមេឃុំ-ចៅសង្កាត់ ជំទប់ទី១ ជំទប់ទី២ និងសមាជិកក្រុមប្រឹក្សា ដែលមិនបានជាប់ឈ្មោះនៅអណត្តិឆ្នាំ២០១៧ ដោយធ្វើការតែងតាំងជាជំនួយការ»។
លិខិតបញ្ជាក់ថា «មេឃុំ-ចៅសង្កាត់ មានឋានៈស្មើអនុប្រធាននាយកដ្ឋាន ជំទប់ទី១ជំទប់ទី២ មានឋានៈស្មើ ប្រធានការិយាល័យ និង សមាជិកក្រុមប្រឹក្សា មានឋានៈស្មើអនុប្រធានការិយាល័យ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បញ្ជាក់ថា៖ «នេះជាគម្រោងគិតទុកជាមុនរបស់គណបក្ស ព្រោះធ្វើអ្វីមិនមែនចៃដន្យ សុទ្ធតែមានផែនការ និងគោលការណ៍ច្បាស់លាស់»។
លោកបន្តថា គ្រាន់តែណែនាំមន្ត្រីថា្នក់ខ្ពស់ៗ ដែលពាក់ព័ន្ធនឹងក្រុមការងារចុះទៅមូលដ្ឋានឲ្យគិតគូរក្នុងករណីណាដែលកើតឡើងជាយថាហេតុ។ លោកបន្ថែមថា៖ «មិនមែនជាការត្រៀមចាញ់ទេ»។
កាលពីថ្ងៃទី២៣ខែធ្នូឆ្នាំ២០១៦ មានលិខិតមួយទៀតក្នុងន័យប្រហែលគ្នានេះ ដែលលោកស្រី ម៉ែន សំអន បានប្រាប់ឲ្យរដ្ឋមន្ត្រីនៅតាមក្រសួង និងរដ្ឋលេខាធិការដ្ឋានសរុបចំនួន២៣ ឲ្យជួយទទួលខុសត្រូវចំពោះមេឃុំឬចៅសង្កាត់របស់គណបក្សខ្លួន ដែលមិនបានជាប់ឈ្មោះជាមេឃុំឬចៅសង្កាត់ឆ្នាំ២០១៧។
កាលពីបោះឆ្នោតឃុំសង្កាត់ឆ្នាំ២០១២ កម្ពុជា មាន១ ៦៣៣ឃុំ-សង្កាត់ ប៉ុន្តែនៅឆ្នាំ២០១៧នេះ ចំនួនឃុំ-សង្កាត់នេះ បានកើនឡើងបន្ថែមទៀតដោយរដ្ឋាភិបាលបំបែកឃុំនិងសង្កាត់ខ្លះជាពីរ ឬជាបី ហើយក្នុងចំណោមមេឃុំ និងចៅសង្កាត់ទាំងនោះ ភាគច្រើនលើសលប់ គឺមកពីគណបក្សប្រជាជនកម្ពុជា៕
