រដ្ឋមន្ត្រីសន្តិសុខជាតិអាមេរិក លោក John Kelly បាននិយាយនៅថ្ងៃនេះថា បទបញ្ជាស្ដីពីបញ្ហាអន្តោរប្រវេនស៍របស់ប្រធានាធិបតីអាមេរិក លោក ដូណាល់ ត្រាំ មានគោលបំណងចាប់ខ្លួនអន្តោប្រវេសន៍ខុសច្បាប់ និងបញ្ជូនពួកគេត្រឡប់ទៅប្រទេសកំណើតវិញ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
លោក John Kelly បានថ្លែងនៅក្នុងសន្និសីទសារព័ត៌មាននៅក្នុងប្រទេសហ្កាតេម៉ាឡាថា បទបញ្ជានោះ ផ្ដោតទៅលើបេសកកម្មស្វែងរកជនអន្តោប្រវេសន៍ខុសច្បាប់មកពីប្រទេសជាច្រើន នៅតាមព្រំដែនអាមេរិក និងបញ្ជូនពួកគេត្រឡប់ទៅប្រទេសដើមវិញ ឲ្យបានឆាប់តាមតែអាចធ្វើទៅបាន។
លោក Kelly បានលើកឡើងដូច្នេះ មួយថ្ងៃក្រោយពីអាមេរិកចេញផ្សាយនូវសេចក្ដីណែនាំថ្មីមួយ ដែលរួមមានផែនការបញ្ជូនជនអន្តោប្រវេសន៍ខុសច្បាប់ទៅប្រទេសកំណើតរបស់ពួកគេវិញ ជាពិសេសប្រទេសម៉ិកស៊ិក៕