រដ្ឋាភិបាលអះអាងថា នៅកម្ពុជាមានការបើកទូលាយសេរីភាពសារព័ត៌មាន និងសេរីភាពបញ្ចេញមតិ ហើយថា ស្ថាប័នព័ត៌មានទាំងអស់គឺជាដៃគូដែលមិនអាចខ្វះបាននៅក្នុងសង្គមប្រជាធិបតេយ្យ។
នៅក្នុងសេចក្តីថ្លែងការរបស់ក្រសួងព័ត៌មានចេញផ្សាយនៅថ្ងៃទី២៣ខែកុម្ភៈនេះ ក្រសួងព័ត៌មានបានច្រានចោលរបាយការណ៍របស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ដែលថា សេរីភាពព័ត៌មាននៅកម្ពុជាក្នុងឆ្នាំ២០១៧ ធ្លាក់ចុះខ្លាំង។ សេចក្តីថ្លែងការណ៍បញ្ជក់ថា របាយការណ៍នេះ ធ្វើឡើងដោយគ្មានមូលដ្ឋាន។
ក្រសួងព័ត៌មានលើកឡើងថា នៅកម្ពុជាសេរីភាពសារព័ត៌មានល្អប្រសើរជាងប្រទេសនានានៅក្នុងតំបន់ ហើយថា វិស័យព័ត៌មានបច្ចុប្បន្នកំពុងតែមានការរីកចម្រើនដែលមានអ្នកសារព័ត៌មានជាង៥០០០នាក់ កំពុងបំពេញការងារដោយសេរីនៅទូទាំងប្រទេស។
របាយការណ៍របស់ CCIM ចេញផ្សាយកាលពីថ្ងៃទី២១ខែកុម្ភៈ បង្ហាញពីការស្ទង់មតិលើអ្នកសារព័ត៌មាន៧៥នាក់ ហើយក្នុងនោះ៨៣%លើកឡើងថា សេរីភាពសារព័ត៌មាននៅកម្ពុជាក្នុងឆ្នាំ២០១៧ធ្លាក់ចុះខ្លាំង។
CCIM បានលើកឡើងថា ស្ថានីយវិទ្យុចំនួន៣២ដែលផ្សាយព័ត៌មានរបស់បក្សប្រឆាំង ព័ត៌មានដែលផ្តល់មូលនិធិដោយសហរដ្ឋអាមេរិក ឬផ្សាយព័ត៌មានឯករាជ្យត្រូវបានបិទ។ ចំណែកស្ថាប័នកាសែត និងអ្នកសារព័ត៌មានឯករាជ្យមួយចំនួនទៀតត្រូវបានគំរាមកំហែងចោទប្រកាន់ពីបទល្មើសផ្សេងៗ៕
