ខណៈការបោះឆ្នោតកាន់តែជិតមកដល់ ក្រសួងមហាផ្ទៃនៅមិនទាន់ផ្តល់ភាពស្របច្បាប់ ឲ្យបក្សប្រឆាំង នៅឡើយទេ ដោយអះអាងថាសមាជផ្លាស់ប្តូរមេដឹកនាំថ្មីនោះធ្វើឡើងផ្ទុយលក្ខន្តិកៈរបស់ខ្លួន ក្រោយពីលោក សម រង្ស៊ី ប្រកាសលាលែងពីតំណែងប្រធានបក្សសង្រ្គោះជាតិ។
កាលពីថ្ងៃទី២ ខែមីនា គណបក្សសង្គ្រោះជាតិបានធ្វើសមាជវិសមញ្ញ ដោយជ្រើសរើសលោក កឹម សុខា ជាប្រធានស្តីទីឲ្យឡើងកាន់តំណែងជាប្រធានបក្សជំនួសលោក សម រង្ស៊ី និងបានជ្រើសរើសអនុប្រធាន៣រូបទៀត មានលោក ប៉ុល ហំម លោក អេង ឆៃអ៊ាង និងលោកស្រី មួរ សុខហួរ ។
ប៉ុន្តែលិខិតចុះថ្ងៃទី២២ ខែមីនា ដែលក្រសួងមហាផ្ញើទៅកាន់គណបក្សសង្គ្រោះជាតិ បានលើកឡើងថា សមាជនោះបានអនុវត្តផ្ទុយលក្ខន្តិកៈគណបក្ស ត្រង់ប្រការ៤៧។
ទោះជាយ៉ាងណាក្រសួងមហាផ្ទៃមិនបានបញ្ជាក់ថា គណបក្សប្រឆាំង គួរកែសម្រួលបែបណា ទើបអាចឲ្យក្រសួងសាមីមួយនេះ ផ្តល់សុពលភាពដល់ក្បាលម៉ាស៊ីនដឹកថ្មីនោះទេ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ឲ្យVODដឹងនៅថ្ងៃទី២៣មីនានេះថា លោកក៏មិនអាចបញ្ជាក់លើបញ្ហានេះបានដែរ ដោយថាទុកឲ្យបក្សប្រឆាំងជាអ្នកពិចារណាខ្លួនឯង។ ប៉ុន្តែលោកថា បើបក្សប្រឆាំងយឺតយ៉ាវ កែសម្រួលបញ្ហានេះ លោកថាអាចប៉ះពាល់ដល់ការចុះបញ្ជីបេក្ខភាពក្រុមប្រឹក្សាឃុំ-សង្កាត់។
លោកថា៖ «តាមពូយល់ទេណា បើគាត់មិនទាន់បានសុពលភាពផង ធ្វើម៉េចនឹងស៊ីញេបេក្ខជនទៅកើត ឧទាហណ៍ជួនកាលថ្នាក់ខេត្តអាចផ្ទេរសិទ្ធិឲ្យប្រធានបក្សខេត្តស៊ីញ៉េទៅដូចជាមិនអី ប៉ុន្តែយើងមិនដឹងជាយ៉ាងម៉េចទេ។ ប៉ុន្តែទោះយ៉ាងណាក៏ដោយ នៅពេលដែលមិនទាន់មានសុពលភាពហើយ ទោះតិចឬច្រើន ក៏វាប៉ះពាល់ដែរ ទោះតិចឬច្រើនក៏ដោយ ហើយពូគិតថាការប៉ះពាល់ឬមិនប៉ះពាល់វាអាស្រ័យលើ គជប ទេមិនមែនក្រសួងមហាផ្ទៃជាអ្នកសម្រេចទេ»។
ការប្រោះឆ្នោតជ្រើសរើសក្រុមប្រឹក្សាឃុំ-សង្កាត់ នឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧ ពោលគឺនៅសល់មិនដល់ពីរខែទៀតទេ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ សុំមិនធ្វើអត្ថាធិប្បាយលំអិតទេ ដោយគ្រាន់តែបញ្ជាក់បែបនេះថា៖ «ថ្ងៃនេះគណបក្សបានសរសេរលិខិតទៅសម្តេចក្រឡាហោម សុំជួបសម្តេចឬតំណាងក្រសួងមហាផ្ទៃ ដើម្បីជួបពិភាក្សាបញ្ហាដែលបានលើកឡើងនៅក្នុងលិខិតហ្នឹងបាទ ហ្នឹងខ្ញុំសុំឆ្លើយប៉ុណ្ណឹង»។
ប៉ុន្តែកន្លងទៅអនុប្រធានគណបក្សនេះ លោក អេង ឆៃអ៊ាង ធ្លាប់ប្រកាសតាមបណ្តាញសង្គមថា សមាជវិសមញ្ញរបស់ខ្លួនធ្វើឡើងស្របតាមលក្ខន្តិកៈ។
លោក អេង ឆៃអ៊ាង បានពន្យល់ថា សមាជគណបក្សមានពីរប្រភេទ គឺសមាជសមញ្ញនិងវិសមញ្ញ។ លោកថាសមាជសមញ្ញធ្វើ៥ឆ្នាំម្តង និងវិសមញ្ញធ្វើឡើងក្នុងករណីចំបាច់ តាមការស្នើសុំពីប្រធានគណបក្ស ឬពីសំឡេង២ភាគ៣នៃគណៈកម្មាធិការអចិន្ត្រៃយគណបក្ស ឬ២ភាគ៣នៃគណៈកម្មការនាយក។
លោក អេង ឆៃអ៊ាង ឲ្យដឹងទៀតថា យោងតាមប្រកា២១នៃលក្ខន្តិកៈ គណៈកម្មាធិការអចិន្ត្រៃយគណបក្សបានកោះប្រជុំសមាជវិសាមញ្ញនៅថ្ងៃទី២ខែមីនា។ លោកបន្តថាសមាជនោះ មានការគាំទ្រដោយគណៈកម្មការនាយក ដោយសំឡេងលើសពី២ភាគ៣ ទើបសមាជបានពិនិត្យនិងអនុម័តធ្វើវិសោធនកម្មលក្ខន្តិកៈប្រការ៤៥និងប្រការ៤៧។
លោកថា៖ «ដូច្នេះខ្ញុំសូមជម្រាបជូនជាថ្មីម្តងទៀតថា សមាជវិសមញ្ញ របស់គណបក្សថ្ងៃទី២ខែមីនាដែលយើងបានរៀបចំធ្វើកន្លងមកនេះ ស្របតាមលក្ខន្តិកៈរបស់គណបក្សហើយថ្នាក់ដឹកនាំជាន់ខ្ពស់ របស់គណបក្សដែលអនុម័តដោយសមាជវិសមញ្ញកាលពីថ្ងៃទី២ខែមីនាកន្លងមកនេះ ក៏ស្របនឹងលក្ខន្តិកៈផងដែរ»។
យ៉ាងណាក៏ដោយសមាជិកសម្ព័ន្ធកំណែទម្រង់ការបោះឆ្នោត លោក យង់ គិមអេង លើកឡើងថា គណបក្សសង្គ្រោះជាតិមិនគួរមានបញ្ហាពីការចុះបញ្ជីគណបក្សឬផ្តល់សុពលភាពនេះទេ ដោយលោកថា លោក សម រង្ស៊ី បានប្រកាសលាលែងពីប្រធានគណបក្សជាផ្លូវការរួចហើយ ។ លោកថាសមាជវិសមញ្ញនោះទៀតសោត លោក សម រង្ស៊ី ក៏មិនបានប្តឹងផ្តល់ករណីនេះទៅក្រសួងមហាផ្ទៃដែរ។
អ្នកឃ្លាំមើលការបោះឆ្នោតរូបនោះ ជំរុញឲ្យក្រសួងមហាផ្ទៃធ្វើការឈរលើគោលការឯករាជ្យ បង្កលក្ខណៈងាយស្រួលឲ្យគណបក្សនយោបាយ នានាបានចុះឈ្មោះចូលរួមប្រកួតប្រជែងស្របតាមលក្ខណៈច្បាប់ដោយតម្លាភាព ជាជាងប្រើតួនាទី បង្កការលំបាក ដល់គណបក្សដទៃដែលខ្លួនមិនគាំទ្រ។
នៅក្នុងលិខិតផ្ញើទៅកាន់គណបក្សសង្រ្គោះជាតិកាលពីម្សិលមិញនេះ ក្រសួងមហាផ្ទៃក៏ស្នើឲ្យគណបក្សប្រឆាំងលុបចោលនូវសារនយោបាយ ដែលដាក់ក្នុងគោលនយោបាយថា «ដូរមេឃុំបម្រើបក្សដាក់មេឃុំបម្រើរាស្ត្រ» ផងដែរ ដោយក្រសួងថាសារនយោបាយនេះ ផ្ទុយនឹងស្មារតីរដ្ឋធម្មនុញ្ញ ផ្ទុយនឹងច្បាប់ស្តីពីគណបក្សនយោបាយ ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់ និងច្បាប់ស្តីពីការគ្រប់គ្រងរដ្ឋបាលឃុំ សង្កាត់៕
