សមត្ថកិច្ចចាប់ខ្លួ​ន​អតីតប្រធានាធិបតីកូរ៉េខាងត្បូងករណីពុករលួយ

សមត្ថកិច្ចចាប់ខ្លួនអតីតប្រធានាធិបតីកូរ៉េខាងត្បូងលោកលី មីយ៉ុងបាក់(Lee Myung-bak) កាលពីថ្ងៃព្រហស្បតិ៍ម្សិលមិញដោយចោទថា ពាក់ព័ន្ធករណីប្រព្រឹត្តិអំពើពុករលួយពេលដែលកាន់តំណែង។​

លោកលី មីយ៉ុងបាក់ អាយុ៧៦ឆ្នាំ ជាអ្នកជំនួញមួយរូបបានជាប់ឆ្នោតជាប្រធានាធិបតីកាលពីឆ្នាំ២០០៨ ដល់២០១៣។ លោកកំពុងប្រឈមការចោទប្រកាន់ពាក់ព័ន្ធការទទួលសំណូក ការរំលោភអំពានអំណាច និងការគេចវេសមិនព្រមបង់ពន្ធ។ នេះបើតាមទីភ្នាក់ងារព័ត៌មាន​AFP។​

​លោកលី មីយ៉ុងបាក់ គឺជាអតីតប្រធានាធិបតីទី៤ហើយដែលនៅរស់រានមានជីវិត ហើយត្រូវតុលាការបញ្ជាឲ្យចាប់ឃុំខ្លួនដោយសារកំហុសក្នុងពេលដឹកនាំ។​

រូបភាពដែលបង្ហាញតាមទូរទស្សន៍មួយចំនួនក្នុងប្រទេសកូរ៉េខាងត្បូងបង្ហាញពីរូបលោកលី មីយ៉ុងបាក់ ពាក់អាវធំពណ៌ខ្មៅ មានក្រវ៉ាត់ក ត្រូវសមត្ថកិច្ចចាប់ដៃអមសងខាងនាំខ្លួនចេញពីផ្ទះ ចូលក្នុងរថយន្ត ហើយរថយន្តនោះក៏បើកចេញដោយមានម៉ូតូកម្លាំងនគរបាលបើកអម។

តាមការចុះផ្សាយរបស់ទីភ្នាក់ងារព័ត៌មានរដ្ឋកូរ៉េខាងត្បូងយ៉ុងហាប់ បញ្ជាក់ថា អតីតប្រធានា ធិបតីរូបនេះ ត្រូវនាំយកទៅឃុំខ្លួននៅកន្លែងឃុំឃាំងនៅភាគខាងកើតនៃទីក្រុងសេអ៊ូល។

​លោកលី មីយ៉ុងបាក់ បានសរសេរសេចក្តីថ្លែងការណ៍ដោយផ្ទាល់ដៃថា លោកមិនបន្ទោសអ្នកណាទេក្នុងករណីនេះ ហើយថា លោកមានការស្តាយក្រោយចំពោះហុសទាំងនោះ។​