ក្រុមកម្មករបម្រើកការងារនៅរោងចក្រ ហ្វឺស ហ្គាវ័ន្ត ស្ថិតសង្កាត់ចាក់អង្រែក្រោម ខណ្ឌលមានជ័យ ក្នុងរាជធានីភ្នំពេញ បានប្រមូលផ្តុំគ្នាមុខសាលាខណ្ឌនេះ នៅម៉ោង ២រសៀលនេះ ដើម្បីរកអត្តរាគមន៍ករណីថៅកែអត់បើកប្រាក់ឈ្នួលឲ្យពួកគេ។
កម្មការិនីបម្រើការងារនៅរោងចក្រ ហ្វឺស ហ្គាវ័ន្ត កញ្ញា សាត សំណាង ប្រាប់វីអូឌីនៅថ្ងៃនេះថា រយៈពេលជិត ៤ខែហើយ ថៅកែរោងចក្រ ហ្វឺស ហ្គាវ័ន្ត ដែលជាជនជាតិកូរ៉េខាងត្បូង មិនបានបើកប្រាក់ឈ្នួលឲ្យកម្មករនោះទេ។
កម្មការនីរូបនេះ បន្តថា នៅម៉ោង ២រសៀលថ្ងៃនេះ កម្មករប្រហែល ១០០នាក់នឹងទៅប្រមូលផ្តុំគ្នាមុខសាលាខណ្ឌមានជ័យដើម្បីដាក់ញត្តិសុំជួយអន្តរាគមន៍។
កញ្ញាបន្ថែមថា៖ «ផលលំបាកមានច្រើនណាស់ ដូចជា អត់លុយបង់ផ្ទះជួល អត់លុយចាយប្រចាំថ្ងៃ អត់លុយ បង់ធនាគារ អត់លុយចំណាយឲ្យកូនរៀន ចូលឆ្នាំៗហ្នឹងអត់បានទៅបានទៅស្រុកផង ប៉ុន្តែអ្នកខ្លះគាត់ចង់ការលុយគេដើម្បីបានទៅស្រុកដែរ ឥលូវពួកខ្ញុំកំពុងតែរៀបចំលិខិតដាក់ទៅខាងអង្គការ ILO ខាងទូតកូរ៉េ GMAC និងក្រសួងការងារ»។
មន្រ្តីរដ្ឋបាលរោងចក្រ ហ្វឺស ហ្គាវ័ន្ត ដែលប្រាប់ថាឈ្មោះ ឡាយ មានប្រសាសន៍ថា រោងចក្របានបើកប្រាក់ឈ្នួលឲ្យកម្មករហើយ ប៉ុន្តែ កម្មករទាំងនោះមិនព្រមទទួលយក និងបានធ្វើកូដកម្មបន្ត ហើយទាមទារប្រាក់ឈ្នួលពេញដែលក្រុមហ៊ុនមិនអាចផ្តល់ជូនបាន។
លោកបន្ថែមថា៖ «ប្រាក់ឈ្នួលខែ១ យើងបានទូទាត់ឲ្យគាត់ ប៉ុន្តែ គាត់អត់យកខែ២ ខែ៣ គឺពួកគាត់ធ្វើកូដកម្ម។ អញ្ចឹង តាមផ្លូវច្បាប់កូដកម្ម គឺគ្មានលុយទេ ប៉ុន្តែ ក្រុមហ៊ុនអនុគ្រោះ យើងបានផ្តល់ឲ្យ ១៧ដុល្លារក្នុងមួយខែទៀត ប៉ុន្តែ គាត់អត់យកទៀត គាត់កូដកម្ម គាត់ចង់បានលុយប្រាក់ខែពេញ។ អញ្ចឹង ក្រុមហ៊ុនអត់មានលទ្ធភាពផ្តល់លុយឲ្យពួកគាត់ពេញទេ»។
ប្រធានសហជីពស៊ីខៅដូប្រចាំរោងចក្រ ហ្វឺស ហ្គាវ័ន្ត លោក ឃឹម មករា មានប្រសាសន៍ថា ការលើកឡើងរបស់តំណាងរោងចក្រនោះ គឺជាសម្តីមិនទទួលខុសត្រូវ និងគេចវេសមិនចង់ទូរទាត់សំណងជូនកម្មករ។
លោក ឃឹម មករា បន្តថា កម្មករមិនបានធ្វើកូដកម្មនោះទេ គឺរោងចក្របិទទ្វារមិនឲ្យកម្មករចូលធ្វើការ ហើយថា កាលពីថ្ងៃទី២០កុម្ភៈ កម្មករក៏ទទួលបានលិខិតពីក្រុមប្រឹក្សារអាជ្ញាកណ្តាលបញ្ជាក់ថា រោងចក្រ ហ្វឺស ហ្គាវ័ន្ត បិទចង្វាក់ផលិតកម្មរបស់ខ្លួនដែរ។
លោកបន្ថែមថា៖ «ខ្ញុំគ្រាន់តែចង់បញ្ជាក់ថា ពួកខ្ញុំកម្មករ គឺរង់ចាំបើកប្រាក់ឈ្នួលខែ១២ហ្នឹងទេ ពួកខ្ញុំមិនមែនធ្វើកូដកម្មទេ ហើយខាងក្រុមប្រឹក្សាអាជ្ញាកណ្តាលចេញលិខិតសេចក្តីសម្រេចមួយកាលពីថ្ងៃទី២០កុម្ភៈដែរថា ក្រុមហ៊ុនបិទទ្វារោងចក្រទាំងមូល មានន័យថា ក្រុមហ៊ុន Lock out ដោយខ្លួនឯង។ អញ្ចឹងហើយបើនិយាយតាមផ្លូវច្បាប់ គឺកម្មករត្រូវបានប្រាក់ឈ្នួលពេញ ១០០%ពេញចាប់ពីខែ១២រហូតមកដល់បច្ចុប្បន្នហ្នឹង»។
រោងចក្រ ហ្វឺស ហ្គាវ័ន្ត នៅខណ្ឌមានជ័យរាជធានីភ្នំពេញ និងរោងចក្រ ហ្គាវ័ន្តនៅក្រុងតាខ្មៅខេត្តកណ្តាល មានថៅកែជនជាតិកូរ៉េខាងត្បូងតែមួយឈ្មោះ លោក ស្រី ឆា ត្យុងហី ។ រោងចក្រទាំងពីរនេះ មានកម្មករជាង ១០០០នាក់ កំពុងមានវិវាទការងារដូចគ្នារយៈពេលជាង ១ឆ្នាំហើយ ដោយអះអាងថា ថៅកែរោងចក្រនោះបើកប្រាក់ឈ្នួលឲ្យកម្មករមិនទៀងទាត់។
ការអូសបន្លាយវិវាទការងារនៅរោងចក្រទាំងពីរនេះដែរ ប្រធានសហភាពការងារកម្ពុជា លោក អាត់ ធន់ ធ្លាប់បន្ទោសទៅមន្រ្តីក្រសួងការងារថា ដោះស្រាយយឺតយ៉ាវ ដោយបណ្តាលឲ្យកម្មករបម្រើការងារនៅទីនោះរងទុក្ខលំបាករហូតមកដល់សព្វថ្ងៃនេះ៕