ក្រុមសកម្មជនសហគមន៍បឹងកក់ បានដាក់លិខិតជាលើកទី៣ ទៅក្រសួងយុត្តិធម៌ និងខុទ្ទកាល័យលោកនាយករដ្ឋមន្ត្រី ហ៊ុន សែន នៅថ្ងៃនេះ ដោយបានស្នើសុំឲ្យដោះលែងសកម្មជនដីធ្លីបឹងកក់ អ្នកស្រី ទេព វន្នី ដែលកំពុងជាប់ឃុំ។
អ្នកស្រី ហួត ច័ន្ទសុវណ្ណ ដែលត្រូវជាបងស្រីរបស់អ្នកស្រី ទេព វន្នី បានប្រាប់វីអូឌីនៅថ្ងៃនេះថា ក្រុមប្រជាសហគមន៍បឹងកក់ ៧នាក់ បានស្នើសុំឲ្យដោះលែងតំណាងរបស់ពួកគេ នៅចំថ្ងៃបុណ្យវិសាខបូជាខាងមុខនេះ។
អ្នកស្រី ហួត ច័ន្ទសុវណ្ណ បន្តថា មន្ត្រីក្រសួងយុត្តិធម៌ និងមន្រ្តីខុទ្ទកាល័យនាយករដ្ឋមន្រ្តី បានទទួលយកញ្ញត្តិដែលពួកគាត់បានដាក់នោះហើយ។
តាមអ្នកស្រីហួត ច័ន្ទសុវណ្ណ នេះជាលើកទី៣ហើយដែលក្រុមគ្រួសារអ្នកស្រី និងសកម្មជនសហគមន៍បឹងកក់ដទៃទៀត បានដាក់ញ្ញត្តិ ស្នើសុំឲ្យមានការលើកលែងទោសអ្នកស្រីទេព វន្នី បន្ទាប់ពីសំណើសុំពីរលើកកន្លងមកនោះ ពុំទទួលបានការឆ្លើយតបជាវិជ្ជមាននោះ។
អ្នកស្រី ទេព វន្នី ត្រូវអាជ្ញាធរចាប់ខ្លួនកាលពីថ្ងៃទី១៥ ខែសីហា ឆ្នាំ២០១៦ នៅពេលដែលអ្នកស្រីចូលរួមធ្វើយុទ្ធនាការថ្ងៃចន្ទពណ៌ខ្មៅ ដែលទាមទារឲ្យដោះលែងមន្ត្រីអាដហុក ៤រូប និងមន្ត្រី គ.ជ.បម្នាក់ រួមទាំងជំរុញឲ្យរដ្ឋាភិបាលវែកមុខរក និងអ្នកនៅពីក្រោយការបាញ់សម្លាប់លោក កែម ឡី។
អ្នកស្រី ទេព វន្នីត្រូវបានតុលាការកំពូលសម្រេចឱ្យជាប់ពន្ធនាគារ២ឆ្នាំកន្លះ ពាក់ព័ន្ធនឹងសំណុំរឿងហិង្សាលើសន្តិសុខខណ្ឌដូនពេញ ក្បែរផ្ទះនាយករដ្ឋមន្ត្រី កាលពីឆ្នាំ ២០១៣កន្លងទៅ៕