ប្រមុខការទូតអាមេរិកលោក John Kerry កាលពីថ្ងៃអាទិត្យម្សិលមិញបានកោតសរសើរដល់ការផ្លាស់ប្ដូរអំណាចរបស់ប្រទេសភូមាទៅឲ្យរដ្ឋាភិបាលស៊ីវិលមួយដឹកនាំដោយលោកស្រី អ៊ុង សានស៊ូជី ដែលនេះគឺជាជំរុញបន្ថែមទៀតដល់បុព្វហេតុលទ្ធិប្រជាធិបតេយ្យនៅលើពិភពលោក។
យោងតាមទីភ្នាក់ងារព័ត៌មាន AFP បានឲ្យដឹងថា នៅក្នុងជំនួបលើកដំបូងជាមួយលោកស្រី ស៊ូជី និងរដ្ឋបាលរបស់លោកស្រី បន្ទាប់ពីបានចូលកាន់អំណាចកាលពីខែមីនាកន្លងមកនេះ លោក Kerry បានប្រាប់ទៅជ័យលាភីណូបែលសន្តិភាពរូបនេះថា ការផ្លាស់ប្ដូរនៅក្នុងប្រទេសរបស់លោកស្រីទៅរកលទ្ធិប្រជាធិបតេយ្យក្រោយស្ថិតក្រោមរបបយោធារាប់ទសវត្សរ៍មកនោះ គឺជាពន្លឺនៃក្ដីសង្ឃឹម។
លោក Kerry បានថ្លែងនៅឯសន្និសីទកាសែតរួមគ្នាជាមួយលោកស្រី ស៊ូជី នៅរដ្ឋធានីណៃពិដោរថាសារដ៏សាមញ្ញរបស់លោកគឺថា អាមេរិកគាំទ្រការផ្លាស់ប្ដូរតាមលទ្ធិប្រជាធិបតេយ្យដែលបានកើតឡើងនៅភូមា។
ការបោះឆ្នោតជាប្រវត្តិសាស្ត្រកាលពីខែវិច្ឆិកាឆ្នាំមុនដែលនាំឲ្យគណបក្សលោកស្រី ស៊ូជី ចូលកាន់អំណាចនោះ បានបញ្ចប់របបយោធាភូមាដែលបានគ្រប់គ្រងប្រទេសមួយនេះអស់កន្លះសតវត្សរ៍មកនេះ។
លោក Kerry បានសាទរចំពោះដំណើរនេះដោយចាត់ទុកជាព័ត៌មានដ៏ល្អសម្រាប់ប្រជាជននៅលើពិភពលោក។ លោកបានបន្ថែមថារដ្ឋាភិបាលថ្មីបានសម្រេចឡើងនូវរឿងរ៉ាវមិនធម្មតានោះឡើយ។
កាលពីសប្ដាហ៍មុនក្រុងវ៉ាស៊ីនតោនបានលើកលែងទណ្ឌកម្មហិរញ្ញវត្ថុនិងការហ៊ុមព័ទ្ធពាណិជ្ជកម្មជាច្រើន ប៉ុន្តែ នៅរក្សាទុកទណ្ឌកម្មសំខាន់ៗមួយចំនួន ជាពិសេសការរក្សាទុកបញ្ជីខ្មៅនៃបុគ្គលដែលមានទំនាក់ទំនងជិតស្និទ្ធជាមួយរបបយោធា៕