រដ្ឋាភិបាលបានដកតំណែងប្រធាននាយកដ្ឋានតម្រង់ទិសវិជ្ជាជីវៈនៃក្រសួងអប់រំ លោក គ្រី ស៊ាងឡុង ក្រោយពីមានរឿងអាស្រូវបៀតបៀនកេរ្តិ៍ភេទទៅលើនារីជាអ្នកបកប្រែជនជាតិកូរ៉េ ពេលមន្ត្រីកម្ពុជារូបនោះទៅចូលរួមកិច្ចប្រជុំអាស៊ានបូក៣។
ក្នុងសេចក្តីប្រកាសព័ត៌មានរបស់ក្រសួងអប់រំចុះថ្ងៃទី២៣ ខែមិថុនានេះ ក្រសួងអប់រំ យុវជន និងកីឡាបានឲ្យដឹងថា ក្រុមប្រឹក្សាវិន័យរបស់ក្រសួងអប់រំបានចាត់វិធានការរដ្ឋបាលដោយដកតួនាទីលោក គ្រី ស៊ាងឡុង។
ក្នុងសេចក្តីប្រកាសព័ត៌មានដដែលបានបន្តថាក្រសួងអប់រំ យុវជន និងកីឡា មិនបានបានចំណាយប្រាក់របស់ក្រសួងប្រហែល១២ ៣០០ដុល្លារ ធានាលោក គ្រី ស៊ាងឡុង ឲ្យរួចផុតពីការឃុំខ្លួននៅកូរ៉េខាងត្បូងទាក់ទិនបទចោទបៀតបៀនកេរ្តិ៍ភេទអ្នកបកប្រែជាជនជាតិកូរ៉េ ដូចការចុះផ្សាយរបស់កាសែតខេមបូឌាដេលី កាលពីថ្ងៃទី២៣ ខែមិថុនា នោះទេ។ ក្រសួងថាថវិកាដែលបង់ពិន័យសំណងរដ្ឋប្បវេណីឲ្យជនរងគ្រោះនោះ សាម៉ីខ្លួនបានខ្ចីថវិកាមួយចំនួនដែលបានមកពីសហការីនិងរបស់អង្គភាពនៃនាយកដ្ឋានតម្រង់ទិសវិជ្ជាជីវៈ ប៉ុន្តែរហូតដល់បច្ចុប្បន្ននេះក្រសួងថាសាម៉ីខ្លួនបានសងអង្គភាពរួចហើយ។
កាសែតខេមបូឌាដេលីចុះផ្សាយថាកាលពីថ្ងៃទី៩ខែមិថុនា ឯកអគ្គរាជទូតប្រចាំកូរ៉េខាងត្បូង លោក ឡុង ឌីម៉ង់ ផ្ញើលិខិតមួយច្បាប់មកកាន់រដ្ឋមន្ត្រីក្រសួងការបរទេសកម្ពុជាលោក ប្រាក់ សុខុន ដោយបញ្ជាក់ថាប្រាក់ប្រហែល ១២ ៣០០ដុល្លារនោះចេញដោយក្រសួងអប់រំសម្រាប់ចំណាយទៅលើការផាកពិន័យ សងជម្ងឺចិត្តដល់ស្ត្រីរងគ្រោះដែលបានដាក់ពាក្យប្តឹង បង់ថ្លៃមេធាវី និងចំណាយផ្សេងៗទៀតសម្រាប់ការធានាឲ្យលោក គ្រី ស៊ាងឡុង រួចផុតពីការឃុំខ្លួននៅប្រទេសកូរ៉េខាងត្បូង៕
