នាយករដ្ឋមន្ត្រីអង់គ្លេសលោកស្រី ធាសា មេ កាលពីថ្ងៃព្រហស្បតិ៍ម្សិលមិញ បានសន្យាឲ្យប្រជាពលរដ្ឋនៃបណ្តាប្រទេសសមាជិកសហភាពអឺរ៉ុបអាចបន្តរស់នៅក្នុងប្រទេសអង់គ្លេសធម្មតា ក្រោយពេលប្រទេសរៀបចំចាកចេញជាផ្លូវការ ប៉ុន្តែថាតុលាការជាន់ខ្ពស់របស់សហភាពអឺរ៉ុបត្រូវគោរពតាមច្បាប់នៅប្រុចសែល។
នៅក្នុងកិច្ចប្រជុំកំពូលនៅទីក្រុងប្រុចសែលនៃប្រទេសប៊ែលហ្សិក លោកស្រី មេ បានប្តេជ្ញាថា នឹងមិនមានចំណាត់ការផ្លូវច្បាប់ក្នុងការតម្រូវឲ្យពលរដ្ឋមកពីប្រទេសជាសមាជិកសហភាពអឺរ៉ុបចាកចេញពីប្រទេសអង់គ្លេសនោះទេ។ នេះបើតាមទីភ្នាក់ងារព័ត៌មាន AFP។
លោកស្រីមេ ថ្លែងថាតួនាទីរបស់អង់គ្លេសពេលបច្ចុប្បន្នក្នុងការផ្តល់តម្លាភាពនិងផលប្រយោជន៍ផ្សេងៗទៀត ផ្តល់ឲ្យពលរដ្ឋសមាជិកសហភាពអឺរ៉ុប ឲ្យបានច្រើនតាមការដែលអាចធ្វើទៅបាន។
បច្ចុប្បន្នប្រជាជនសហភាពអឺរ៉ុប ដែលកំពុងរស់នៅក្នុងប្រទេសអង់គ្លេសមានប្រមាណ៣លាននាក់។ ដំបូងឡើយគេរំពឹងថា ពលរដ្ឋប្រទេសសមាជិកអឺរ៉ុបផ្សេងៗទៀតនឹងទៅរស់នៅអង់គ្លេសកាន់តែកើនឡើង ប៉ុន្តែកាលពីឆ្នាំមុនប្រជាពលរដ្ឋអង់គ្លេសបានបោះឆ្នោតចាកចេញពីសមាជិករបស់សហភាពអឺរ៉ុបក្នុងចំណោម២៨ប្រទេសផ្សេង៕