មជ្ឍមណ្ឌលសិទ្ធិមនុស្សកម្ពុជា ហៅកាត់ថា CCHR រកឃើញថា សិទ្ធិទទួលបានការសន្មតទុកជាមុនថា គ្មានទោសមិនត្រូវបានគោរពនៅកម្ពុជាឡើយ ដោយសារការប្រើប្រាស់ឯកសណ្ឋានមិនត្រឹមត្រូវរវាងទណ្ឌិត និងជនជាប់ចោទ។
ក្នុងព្រឹត្តិបត្រព័ត៌មានសម្រាប់ខែមិថុនានេះ មជ្ឈមណ្ឌលសិទ្ធិមនុស្សកម្ពុជា បានរកឃើញថា ក្នុងពេលសវនការនៅសាលាឧទ្ធរណ៍ចាប់ពីថ្ងៃទី១វិច្ឆិកាឆ្នាំ២០១៦ ដល់ថ្ងៃទី៣០មេសាឆ្នាំ២០១៧ សវនាការចំនួន២៤ក្នុងចំណោម២៤៨ មានជនជាប់ចោទ៣០នាក់ បានបង្ហាញខ្លួនក្នុងឯកសណ្ឋានទណ្ឌិតព័ណ៌ខៀវ ដែលនេះ បង្ហាញថា ការគោរពសិទ្ធិទទួលបានការសន្មតទុកជាមុនថាគ្មានទោស ដែលបានការពារដោយរដ្ឋធម្មនុញ និងច្បាប់សិទ្ធិមនុស្សអន្តរជាតិ មិនត្រូវបានអាជ្ញាធរគោរពពេញនៅឡើយទេ។
អ្នកនាំពាក្យអគ្គនាយកដ្ឋានពន្ធនាគារលោក នុត សាវនា បានទទួលស្គាល់ថាករណីនេះ គឺកើតមានមែន តែលោកថា ការរកឃើញរបស់មជ្ឈមណ្ឌលសិទ្ធិមនុស្សកម្ពុជា មិនបានឆ្លុះបញ្ចាំពីការអនុវត្តនិងបញ្ហាដែលអគ្គនាយកដ្ឋានពន្ធនាគារ កំពុងជួបប្រទះនោះទេ។
លោកថា៖ «យើងមិនអាចសន្មតថា ការពាក់ឯកសណ្ឋានហ្នឹង ថាអ្នកបានកាត់ទោសហើយអ្នកមិនទាន់កាត់ហើយ គោលបំណងគឺធ្វើអញ្ចឹង តែវាពិបាកក្នុងការសម្រួលការងារហ្នឹង ដោយសារចំនួនអ្នកជាប់ឃុំហ្នឹង យប់ខ្លះកើនដល់ជាង២០នាក់អី នៅសៀមរាម! ២៨នាក់ហើយទៅធ្វើមិចខោអាវមានតែខ្ចីគ្នាស្លៀកសិន។…រឿងហ្នឹង ដូចជាមានគោលការណ៍ដែរហើយបានស្នើដល់អគ្គភស្ភុភារ លើកថាធ្វើមិចឲ្យការផលិតហ្នឹងលើសចំណុះបន្តិចទៅ កុំឲ្យស្មើរៗពេក បញ្ហាយើងដឹងហើយថាបញ្ហា (ដំណើការ) ហ្នឹងជួនកាលត្រូវកំណត់ថាត្រូវធ្វើត្រូវកាត់ហើយ តែលុយអត់ទាន់ធ្លាក់ទេ។ ដល់អញ្ចឹងហើយខាងប្រធានពន្ធនាគារគ្នាទៅរកលុយឯណា?»។
រដ្ឋធម្មនុញ្ញនៃព្រះរាជាណាចក្រកម្ពុជាមាត្រា៣៨ កថាខណ្ឌទី៧ចែងថា «ជនជាប់ចោទណាក៏ដោយ ត្រូវចាត់ទុកជាមនុស្សឥតទោសដរាបណាតុលាការមិនទាន់កាត់ទោសជាស្ថាពរ»។ សិទ្ធិនេះក៏ត្រូវបានការពារដោយច្បាប់សិទ្ធិមនុស្សអន្តរជាតិផងដែរក្នុងសេចក្តីប្រកាសជាសកលស្តីពីសិទ្ធិមនុស្សមាត្រា ១១(១) ដែលបានធានានូវសិទ្ធិទទួលបានការសន្មតជាមុនថាគ្មានទោស រហូតដល់ពិរុទ្ធភាពត្រូវបានរកឃើញ៕
