អាជ្ញាធរខេត្តបាត់ដំបងបានចាប់ផ្សឹក ហើយវាយខ្នោះព្រះសង្ឃមួយអង្គនៅវត្តមួយក្នុងខេត្តបាត់ដំបង កាលពីថ្ងៃពុធ បន្ទាប់ពីព្រះសង្ឃដែលជាសមាជិកបណ្តាញព្រះសង្ឃឯករាជ្យនោះ បានបង្ហោះរូបថតកាំភ្លើងមួយដើមនៅលើហ្វេសប៊ុក។
ព្រះសង្ឃ ប៊ុត ប៊ុនតិញ ប្រធានបណ្តាញព្រះសង្ឃឯករាជ្យដើម្បីយុត្តិធម៌សង្គម មានសង្ឃដីកាថា កាំភ្លើងនោះជាកាំភ្លើងជ័រ មិនគួរណាអាជ្ញាធរខេត្តបាត់ដំបងចោទប្រកាន់ពីបទប្រើប្រាស់អាវុធខុសច្បាប់នោះទេ។
នៅតាមបណ្តាញសង្គមវិញ ក៏មានរិះគន់ជាច្រើនទៅលើចំណាត់របស់តុលាការខេត្តបាត់ដំបងចំពោះព្រះសង្ឃ ព្រះនាម ហន សុផាន្នី គង់នៅវត្តដំរីស។
មានសំណួរជាច្រើនត្រូវបានលើកឡើងនៅតាមបណ្តាញសង្គម ដោយចំអកទៅលើការចោទប្រកាន់នេះ។ ចំអកនៅត្រង់ថា ប្រសិនបើយកកាំភ្លើងជ័រមកលេង ហើយអាជ្ញាធរចោទថា ប្រើប្រាស់អាវុធខុសច្បាប់នោះ ចុះអ្នករកស៊ីលក់កាំភ្លើងជ័រពាសពេញផ្ទៃប្រទេសខុសច្បាប់ឬទេ? លើសពីនេះ ការបង្ហាញអាវុធជ័រដោយព្រះសង្ឃដែលធ្លាប់រិះគន់ លោក ហ៊ុន សែន នោះត្រូវបានគេប្រទះឃើញ តាំងពីអំឡុងពីរឬបីខែមុន នៃការចាប់ខ្លួនទៅទៀត។
ចំណាត់ការប្រឆាំងព្រះសង្ឃអង្គនេះ ត្រូវបានព្រះតេជគុណ ប៊ុត ប៊ុនតិញ ភ្ជាប់ទៅនឹងរឿងនយោបាយ ដោយសារតែព្រះសង្ឃអង្គនេះបានចូលរួមសង្កេតការណ៍បោះឆ្នោតនៅសង្កាត់អូចាខេត្តបាត់ដំបង។ សង្កាត់អូចា ត្រូវបានគេស្គាល់តាមរយៈ កញ្ញា ស៊ិន ពៅរ៉ូហ្សិត ជាបេក្ខនារីចៅសង្កាត់ជាប់ឆ្នោតរបស់គណបក្សសង្រ្គោះជាតិ។
បើសិនជាការបង្ហាញរូបអាវុធនៅលើហ្វេសប៊ុក ជាអំពើខុសច្បាប់មែននោះ មានសំណួរជាច្រើនត្រូវបានមហាជនចោទឡើងដោយប្រៀបធៀបនឹងករណី ដែលអ្នកគាំទ្រគណបក្សប្រជាជនកម្ពុជា ថតវីដេអូបង្ហាញកាំភ្លើងពិត ដោយមានគ្រាប់ គំរាមបាញ់សម្លាប់មេដឹកនាំគណបក្សសង្រ្គោះជាតិកន្លងមក។ ប៉ុន្តែករណីទាំងអស់នោះ មិនត្រូវបានអាជ្ញាធរឬតុលាការចាប់ពួកគេទៅដាក់ទោសឡើយ។
ព្រះតេជគុណ បណ្ឌិត ហុក សុវណ្ណ គង់នៅទីក្រុងម៉ុងរ៉េអាល់ ប្រទេសកាណាដា មានថេរដីកាទាក់ទងនឹងករណីព្រះសង្ឃនៅខេត្តបាត់ដំបងនេះថា ឆ្លុះបញ្ចាំងឲ្យពីសមត្ថភាពរបស់សមត្ថកិច្ចដែលអនុវត្តបទបញ្ជានោះគឺជាមនុស្សមិនចេះច្បាប់។
ព្រះអង្គថា «អាជ្ញាធរអត់អង្កេតឲ្យច្បាស់លាស់ តើកាំភ្លើងនោះពិតឬមិនពិត? មុនចាប់លោកត្រូវពិចារណាឲ្យច្បាស់លាស់។ សូម្បីសន្តិសុខក្តី តុលាការក្តី គេមុនកាត់ទោសមនុស្សគេត្រូវអង្កេតឲ្យច្បាស់លាស់ជាមុន។តើលោកកាន់កាំភ្លើងអី? កាំភ្លើងឈើ ទៅចាប់លោក! អាហ្នឹងជាការខុសច្បាប់របស់អាជ្ញាធរខ្មែរ ត្រូវរៀនច្បាប់ម្តងទៀត អត់ចេះច្បាប់ហើយមកធ្វើអាជ្ញាធរ»។
ក្រុមអ្នកតាមដានករណីនេះលើកឡើងថា កំហុសរបស់ព្រះសង្ឃ ហន សុផាន្នី គឺត្រឹមតែគណៈសង្ឃហៅទៅអប់រំគឺវាគ្រប់គ្រាន់ហើយតាមផ្លូវវិន័យព្រះពុទ្ធសាសនា ពោលមិនមែនជាទោសកំហុសដែលត្រូវចាប់ផ្សឹកវាយខ្នោះទៅដាក់គុក ដូចអ្វីដែលអាជ្ញាធរខេត្តបាត់ដំបងអនុវត្តនោះទេ។
ព្រះតេជគុណ បណ្ឌិត ហុក សុវណ្ណ មានថេរដីកាទៀតថា អាជ្ញាធរត្រូវមានការប្រុងប្រយ័ត្នខ្ពស់មុននឹងមានចំណាត់ការប្រឆាំងនឹងព្រះសង្ឃ ដោយថាព្រះសង្ឃជាតួអង្គមួយដែលមនុស្សផងទាំងពួង រួមទាំងព្រះមហាក្សត្រផង គោរព ថ្វាយបង្គំ។
ព្រះអង្គបន្តថា «អាជ្ញាធរហ្នឹងកុំឲ្យធ្វើអំពើអាក្រក់ហ្នឹងតទៀត រំលោភស្ថាប័នពុទ្ធសាសនា។ បើមិនឈប់ទេ គេកាត់ទោសនឹងសន្លឹកឆ្នោត២០១៨។ សន្តិសុខអីមើលមុខព្រះសង្ឃដូចជាសត្រូវនឹងគ្នាពីពេលណាចឹង?…ថ្ងៃណាមួយអ្នកឯងមានទោសគេធ្វើចឹងដែរតើអ្នកឯងគិតថាម៉េច?..»។
ករណីចាប់វាយខ្នោះព្រះសង្ឃនៅខេត្តបាត់ដំបងនេះ នៅមិនទាន់ឃើញមន្រ្តីរដ្ឋាភិបាលចេញមុខបកស្រាយយ៉ាងណានោះទេ ខណៈដែលមានការរិះគន់យ៉ាងកងរំពងនោះ។ ប៉ុន្តែរាល់ចំណាត់កន្លងមកប្រឆាំងនឹងមន្រ្តីសិទ្ធិនិងមន្រ្តីគណបក្សប្រឆាំង មន្រ្តីរដ្ឋាភិបាលតែងតែអះអាងថាជាចំណាត់ផ្លូវច្បាប់ឬហៅម្យ៉ាងថាជាប្រទេសនីតិរដ្ឋ។
អង្គការសង្គមស៊ីវិល ធ្វើការផ្នែកសិទ្ធិមនុស្ស បានកត់សំគាល់ថា កម្ពុជាកំពុងមានបញ្ហាចាក់ស្រេះដែលពិបាកដោះស្រាយ គឺអំពើនិទ្ទណ្ឌភាព ឬភាពគ្មានទោសចំពោះអ្នកប្រព្រឹត្តិបទល្មើស ហើយតែងរួចខ្លួនពីច្បាប់ចំពោះអ្នកមានអំណាចមួយចំនួន។ ចំណែកអ្នកទន់ខ្សោយឬអ្នកមិនគាំទ្ររដ្ឋាភិបាល ច្រើនតែទទួលការដាក់ទោសទណ្ឌដោយចំណាត់ការតុលាការ។ អ្នកវិភាគ យល់ថា អំពើនិទ្ទណ្ឌភាពនេះ គឺជាមូលហេតុចម្បងដែលប៉ះពាល់ទៅដល់ឯករាជ្យភាពនៃប្រព័ន្ធតុលាការ។
អង្គការសិទ្ធិមនុស្សក៏ធ្លាប់ចេញរបាយការណ៍ថា បណ្តឹងរបស់ពលរដ្ឋប្រឆាំងនឹងការប្រើហិង្សាពីសំណាក់អាជ្ញាធរច្រើនតែត្រូវបានតុលាការទុកចោលមិនចាត់ការឡើយ។ ប៉ុន្តែបណ្តឹងខ្លះទៀតដែលអ្នកមានអំណាចឬមន្រ្តីរដ្ឋាភិបាលប្តឹងប្រឆាំងនឹងអ្នកការពារសិទ្ធិមនុស្ស អ្នកនយោបាយបក្សប្រឆាំង សកម្មជនការពារបរិស្ថាន និងក្រុមអ្នកតស៊ូមតិ គឺតុលាការធ្វើការទាំងថ្ងៃឈប់សម្រាកដូចជាសំណុំរឿងមន្រ្តីអាដហុកជាដើម។
ក្រុមអង្គការសង្គមស៊ីវិលតែងតែលើកឡើងថា ការអនុវត្តច្បាប់នៅកម្ពុជាមានស្តង់ដាពីរ។ស្តង់ដាពីរដោយក្រុមអ្នកតាមដានសង្គមមើលឃើញថា ប្រសិនបើអ្នកប្រព្រឹត្តបទល្មើសជាមនុស្សគាំទ្ររដ្ឋាភិបាលគឺកម្រមានទោសណាស់ ប៉ុន្តែបើបុគ្គលនោះ មិនគាំទ្ររដ្ឋាភិបាលឬបើពួកគេជាអ្នកចេញមុខគាំទ្រគណបក្សប្រឆាំងផងនោះ គឺចំណាត់ការផ្លូវច្បាប់ត្រូវបានអនុវត្តភ្លាមៗ បើទោះជាសំណុំរឿងខ្លះអាចដោះស្រាយបាននៅក្រៅប្រព័ន្ធតុលាការក៏ដោយ។
កាលពីពេលថ្មីៗនេះ បុរសម្នាក់ជាប៉ូលីសចរាចរណ៍និងជាកូនប្រុសរដ្ឋលេខាធិការក្រសួងមហាផ្ទៃផងនោះ បានដកកាំភ្លើងបាញ់គំរាមទៅលើភាគីម្ខាងទៀត ក្នុងជម្លោះចរាចរណ៍។ ក្រោយពីមានការរិះគន់យ៉ាងចាស់ដៃពីបណ្តាញសង្គមហ្វេសប៊ុក ក្រសួងមហាផ្ទៃបានត្រឹមបន្ថយស័ក្តប៉ូលីសរូបនោះ តែមិនបានចោទប្រកាន់ពីករណីបាញ់បោះដោយខុសច្បាប់ឡើយ។
អ្នកប្រើប្រាស់ហ្វេសប៊ុក នាំគ្នាបន្ទោសថា ការអនុវត្តន៍ច្បាប់នៅកម្ពុជាមានស្តង់ដារ បើប្រៀបធៀបករណី ព្រះសង្ឃលេងកាំភ្លើងជ័រ នៅខេត្តបាត់ដំបង នឹងករណី ប៉ូលីស លឹម ចំណាន នាយរងការិយាល័យចរាចរណ៍ជើងគោក។ នេះគ្រាន់តែករណីមួយក្នុងចំណោមករណីជាច្រើនទៀត។
អ្នកប្រើប្រាស់ហ្វេសប៊ុកក៏នាំគ្នាបប្រៀបធៀប ករណី អ្នកប្រើហ្វេសប៊ុក ឈ្មោះ ផេង វណ្ណៈ និងឈ្មោះ ខាន់ ចាន់សុផល ដែលតែងតែបង្ហាញរូបកាំភ្លើងពិត និងគំរាមបាញ់សម្លាប់ លោក កឹម សុខា និងសកម្មជនខ្លះរបស់គណបក្សប្រឆាំងនោះ គឺមិនត្រូវបានអាជ្ញាធរចាប់ទៅកាត់ទោសដូចករណី ប៉ូលីសម្នាក់នៅក្រសួងមហាផ្ទៃដែលសមត្ថកិច្ចចាប់ខ្លួនទៅដាក់គុកកាលពីពេលថ្មីៗនេះ ដោយចោទថា ប្រមាថ លោកនាយករដ្ឋមន្រ្តី ហ៊ុន សែន នោះឡើយ។
ក្រុមអ្នកវិភាគ និយាយថា ការដែលអនុវត្តច្បាប់មានស្តង់ដាពីរនេះហើយ អាចជាមូលហេតុចំបងមួយក្នុងចំណោមបញ្ហាជាច្រើនទៀតដែលធ្វើគណបក្សកាន់អំណាចបន្តធ្លាក់ចុះការគាំទ្រតាំងពីបោះឆ្នោតជាតិឆ្នាំ២០១៣រហូតដល់ការបោះឆ្នោត ឃុំ សង្កាត់ កាលពីថ្ងៃទី៤មិថុនា៕